Сырскі раскрыў стратэгію знясілення Расіі

• 28.06.2026, 14:43

Задача ЗСУ — утрымліваць пазіцыі і жорстка контратакаваць.

Галоўнакамандуючы Узброенымі Сіламі Украіны Аляксандр Сырскі у інтэрв’ю The Times распавёў пра стратэгію Кіева, заснаваную на паступовым знясіленні расійскіх сіл, ударах па лагістыцы і ваеннай інфраструктуры, а таксама на нарашчванні тэхналагічнай перавагі (пераклад — сайт Charter97.org).

Паводле слоў генерала, галоўная задача ўкраінскай арміі — утрымліваць пазіцыі і штодня наносіць расійскім войскам максімальна цяжкія страты. З пачатку 2026 года, сцвярджае Сырскі, з ладу выведзена каля 183,5 тысячы расійскіх вайскоўцаў. Усё большую ролю ў гэтым адыгрываюць беспілотнікі, якія істотна павышаюць эфектыўнасць паражэння мэтаў.

Ён таксама адзначыў, што ў маі Украіна ўпершыню з 2023 года здолела павялічыць кантраляваную тэрыторыю. Адначасова ўкраінскія далёкабойныя ўдары былі накіраваныя па аб’ектах паліўна-энергетычнай інфраструктуры, уключаючы нафтаперапрацоўчы завод «Капотня», а таксама па мэтах у анексаваным Крыме. Паводле слоў галоўнакамандуючага, такія атакі закліканыя парушыць расійскую лагістыку, аслабіць эканоміку і прымусіць Маскву пачаць перамовы на ўмовах, прымальных для Кіева.

Пры гэтым Сырскі папярэдзіў ад размоваў пра пералом у вайне. Ён назваў цяперашнюю перавагу Украіны крохкай і падкрэсліў, што сітуацыя на фронце змяняецца вельмі хутка.

Генерал заявіў, што Украіна значна павялічыла вытворчасць беспілотнікаў і цяпер пераўзыходзіць Расію па колькасці FPV-місій у 1,7–2 разы. Аднак сучаснае поле бою стала практычна цалкам праглядным, таму буйныя наступальныя аперацыі надзвычай ускладненыя: любыя буйныя скупчэнні войскаў хутка выяўляюцца і паражаюцца дронамі і артылерыяй.

Паводле ацэнкі Сырскага, перавагамі Расіі застаюцца колькасць войскаў, ракетны арсенал і запасы артылерыйскіх боепрыпасаў, тады як Украіна адчувае недахоп асабовага складу. Ён таксама выказаў меркаванне, што Уладзімір Пуцін не гатовы да міру, таму вайна ператвараецца ў доўгую барацьбу тэхналогій, эканамічных магчымасцяў і рэсурсаў.

Самога Сырскага крытыкі называюць жорсткім камандуючым, тады як яго прыхільнікі лічаць яго «салдацкім генералам».