Сербія адновіць тэрміновую ваенную службу

• 28.06.2026, 17:51

З сакавіка 2027 года.

Прэзідэнт Сербіі Аляксандар Вучыч заявіў 27 чэрвеня, што краіна ўвядзе «вельмі кароткі» перыяд абавязковай ваеннай службы, пачынаючы з сакавіка наступнага года.

Пра гэта 28 чэрвеня паведаміў тэлеканал N1.

Выступаючы на ваенным аэрадроме Батайніца недалёка ад Бялграда, Вучыч заявіў, што гэтаму кроку будуць папярэднічаць неабходныя працэдуры.

Улады Сербіі раней абвяшчалі пра планы аднавіць абавязковую ваенную службу для мужчын ва ўзросце да 30 гадоў. Чакаецца, што тэрмін службы складзе 75 дзён.

Сербія афіцыйна перайшла на прафесійную армію 1 студзеня 2011 года, калі ўступіла ў сілу рашэнне парламента аб прыпыненні абавязковай ваеннай службы.

Звычайны прызыў быў заменены добраахвотнай службай, а Узброеныя сілы камплектаваліся прафесійнымі салдатамі і афіцэрамі.

Раней Вучыч заяўляў пра планы аднавіць абавязковую ваенную службу ў Сербіі ў снежні 2025 года.