Зяленскі: Там, дзе ўпаў Ленін, будзе стаяць Мазепа

• 28.06.2026, 19:41

У цэнтры Кіева ўсталююць новы помнік.

У цэнтры Кіева, дзе раней стаяў помнік Леніну, усталююць помнік украінскаму гетману Івану Мазепу.

Пра гэта паведаміў прэзідэнт Украіны Уладзімір Зяленскі падчас выступлення з нагоды Дня Канстытуцыі.

Помнік могуць усталяваць на скрыжаванні бульвара Тараса Шаўчэнкі і вуліцы Хрэшчацік, дзе калісьці стаяў помнік Леніну, які ў 2013 годзе знеслі ўдзельнікі Рэвалюцыі Годнасці.

Зяленскі, як піша New Voice, нагадаў, што Мазепа з'яўляецца выдатным дзяржаўным і ваенным дзеячам, кіраўніком казацкай дзяржавы.

«Стагоддзямі Расія пляміла ягонае імя, імкнулася, каб украінцы глядзелі на сваю гісторыю чужымі вачыма, пераконваючы наш народ, што Мазепа — здраднік. Гэта хлусня. І, безумоўна, маштаб гэтай постаці заслугоўвае паўнавартаснага помніка ў сталіцы нашай дзяржавы. Лічу, што для яго існуе ідэальнае месца. І я ўпэўнены: там, дзе Ленін упаў, моцна будзе стаяць Мазепа», — сказаў прэзідэнт.

Ён таксама паведаміў, што цяпер бюст Мазепы будзе стаяць і ў Кіева-Пячэрскай лаўры, бо ён быў адным з яе мецэнатаў.