Z-блогер уражаны ракетным ударам Украіны па заводзе ў РФ

• 28.06.2026, 20:09

«Фламінга» даляцелі да Валгаграда.

Z-блогер Максім Калашнікаў прызнаў велізарныя «сляпыя зоны» расійскай СПА пасля пралёту групы ўкраінскіх ракет «Фламінга» і ўдару па Валгаградзе, піша «Дыялог».

У сваім Telegram-канале ён напісаў, што крылатая ракета, якую ён называе больш простай мэтай, чым амерыканскі «Тамагаўк», здолела даляцець да Волгі. Для расійскага правайсковага лагера гэта стала трывожным прызнаннем: неба над Расіяй далёка не такое надзейна абароненае, як гадамі сцвярджала прапаганда.

«Пралёт «Фламінга» над Сталінградам. То бок КР, што значна прасцей за «Тамагаўк», даляцела да Волгі. Уяўляеце сабе памеры «сляпых зон» СПА РФ? Няма паветраных радараў, здольных бачыць КР здалёк (наземныя лакатары далёка не бачаць). Няма паветраных перахопнікаў (у СССР за крылатымі ракетамі павінны былі паляваць МіГ-31М). Лёгка ўявіць, што чакае нас пры такіх жа масіраваных атаках крылатых ракет ЗША, як па Іраку ў 1991-м або па Сербіі ў 1999-м. А калі да амерыканскіх КР дададуцца брытанскія ды еўрапейскія «Storm Shadow», і «Скальпы» з «Таўрусамі»?» — напісаў Калашнікаў.

Паводле яго слоў, праблема палягае не толькі ў асобных правалах, але і ў самой сістэме выяўлення і перахопу. Ён сцвярджае, што расійскім сілам бракуе паветраных радараў, здольных загадзя выяўляць крылатыя ракеты, а магчымасці наземных лакатараў абмежаваныя.

Заходнія і незалежныя ваенныя эксперты таксама ацэньваюць расійскую сістэму СПА як перагружаную і такую, што мае сур'ёзныя прабелы, якімі Украіна паспяхова карыстаецца, наносячы скаардынаваныя ўдары беспілотнікамі і ракетамі.

Паводле ацэнак аналітыкаў Інстытута вывучэння вайны (ISW) і журналістаў CNN, паспяховыя глыбокія ўдары ЗСУ, у тым ліку па Маскоўскім НПЗ у Капотні, прадэманстравалі немагчымасць стварыць суцэльны абарончы купал над усёй тэрыторыяй Расіі і шматлікімі прамысловымі аб'ектамі.

Эксперты адзначаюць, што шматгадовая стратэгія Украіны па знішчэнні расійскіх радыёлакацыйных станцый і пускавых установак прымусіла Маскву перакідваць комплексы СПА да лініі фронту і сталіцы, пакідаючы без дастатковага прыкрыцця іншыя рэгіёны краіны.