Колькі транспарту Мінска абсталявана кандыцыянерамі

• 29.06.2026, 14:21

Ці могуць выпускаць аўтобусы без кандыцыянераў у спёку?

У Мінску кандыцыянерамі абсталяваныя 669 гарадскіх аўтобусаў, 280 тралейбусаў, 23 электробусы і 20 трамваяў. Кіроўцы павінны ўключаць іх з 1 мая па 30 верасня, калі тэмпература паветра на вуліцы — ад +20°С і вышэй, як гаворыцца у правілах «Мінсктранса».

Калі параўнаць гэтыя лічбы з штодзённым выпускам транспарту на лінію, атрымліваецца каля 66% наземнага грамадскага транспарту. У лютым бягучага года намеснік гендырэктара «Мінсктранса» Канстанцін Галалобаў адзначаў, што на лінію ў Мінску выходзіць каля 1,5 тыс. адзінак транспарту: 800 аўтобусаў, 70 электробусаў, 530 тралейбусаў і 87 трамваяў.

Па відах транспарту розніца заўважная: аўтобусаў з кандыцыянерамі — каля 84%, тралейбусаў — 53%, электробусаў — 33%, трамваяў — 23%.

Асноўнае пытанне ў спёку — ці можна выпускаць на лінію транспарт без кандыцыянера. У Правілах аўтамабільных перавозак пасажыраў, зацверджаных пастановай Савміна №147 ад 31 сакавіка 2026 года, патрабаванні да аўтобуса сфармуляваныя праз тэхнічную спраўнасць, дзеючы допуск да ўдзелу ў дарожным руху, відэарэгістратар і апаратуру спадарожнікавай навігацыі. Кандыцыянер у пераліку абавязковага абсталявання не пазначаны.

Аднак калі ў транспарце ўсталяваны кандыцыянер, у Мінску яго павінны ўключаць у цёплы сезон пры тэмпературы ад +20°С.

А пры абнаўленні рухомага саставу кандыцыянеры становяцца абавязковай умовай. Раней «Мінсктранс» заяўляў, што пры закупцы новай тэхнікі наяўнасць сістэмы астуджэння прадугледжваецца ў тэхзаданні, таму частка транспарту з кандыцыянерамі павінна расці. Галалобаў заяўляў, што сярэдні ўзрост рухомага саставу на 1 студзеня 2031 года па Мінску складзе 7,3 года. Павялічыцца і частка наземнага электратранспарту — з 49,3% да 53,7%.

На 29 чэрвеня ў Беларусі аб’яўлялі чырвоны ўзровень небяспекі: паводле прагнозу, удзень на большай частцы тэрыторыі краіны чакалася +35..+39°С, у Мінску — +33..+35°С.