Упершыню за ўсю гісторыю метэаназіранняў тэмпература ў Беларусі перавысіла +40°С

• 29.06.2026, 18:34

Рэкорд зафіксаваны ў Пінску.

Упершыню за ўсю гісторыю метэаназіранняў тэмпература ў Беларусі перавысіла 40 градусаў цяпла. Пра гэта паведамілі ў Рэспубліканскім цэнтры па гідраметэаралогіі, кантролі радыёактыўнага забруджвання і маніторынгу навакольнага асяроддзя Мінпрыроды.

Абсалютны тэмпературны максімум за ўсю гісторыю метэаралагічных назіранняў у Беларусі зафіксаваны ў перыяд 14.00-14.20 у Пінску і склаў плюс 40,4 градуса.

Папярэдні рэкорд складаў +38,9°С. Да такой велічыні слупок тэрмометра падымаўся летам 2010 года ў Гомельскай вобласці.

Нагадаем, у Беларусі падоўжылі найвышэйшы, чырвоны ўзровень небяспекі з-за анамальнай спёкі. Ён будзе дзейнічаць у панядзелак, 29 чэрвеня. На аўторак і сераду ўзровень небяспекі панізілі да аранжавага.