Узброеныя сілы Украіны ўдарылі па трох мастах на Данбасе

• 29.06.2026, 18:42

Імі РФ перакідвала войскі.

Сілы абароны Украіны 28 чэрвеня і ў ноч на 29 чэрвеня нанеслі серыю удараў па важных ваенных аб’ектах расійскіх акупантаў.

Пра гэта паведамляе Генеральны штаб Узброеных Сіл Украіны.

Украінскія вайскоўцы паразілі аўтамабільны мост у раёне Новаазоўска Данецкай вобласці, а таксама два чыгуначныя масты ў Луганскай вобласці.

«Гэтыя аб’екты праціўнік выкарыстоўвае для перакідкі асабовага складу, узбраення, боепрыпасаў і матэрыяльна-тэхнічных сродкаў», — адзначылі ў Генштабе.

Вынікі удараў пакуль удакладняюцца.

Акрамя таго, Сілы абароны паразілі састаў з матэрыяльна-тэхнічнымі сродкамі акупантаў у раёне Новасвятлоўкі Луганскай вобласці.

Таксама пад удары трапілі тры пункты кіравання беспілотнікамі праціўніка паблізу Гуляйполя Запарожскай вобласці, Цёцькіна Курскай вобласці РФ і Бахмута Данецкай вобласці. Асобна быў паражаны пункт кіравання падраздзялення радыёэлектроннай барацьбы акупантаў у раёне Вялікай Навасілкі.

Акрамя таго, пасля дадатковага аналізу пацверджана паражэнне двух аб’ектаў ваеннай сувязі ў раёне населенага пункта Міняева Маскоўскай вобласці РФ 26 чэрвеня. Паводле інфармацыі Генштаба, адзін будынак быў знішчаны, яшчэ адзін атрымаў значныя пашкоджанні з частковым разбурэннем.

«Сілы абароны Украіны і далей будуць сістэмна ажыццяўляць мерапрыемствы, накіраваныя на парушэнне сістэмы кіравання, ваеннай лагістыкі і забеспячэння расійскага агрэсара», — падсумавалі ў Генштабе Узброеных Сіл Украіны.