Зяленскі: палітычнае кіраўніцтва Расіі пастаянна трызніць Данбасам

• 29.06.2026, 21:45

Прэзідэнт Украіны пералічыў усе тэрміны, якія Расія прызначала для захопу Данбаса, і назваў новы.

Прэзідэнт Украіны Уладзімір Зяленскі у вячэрнім звароце 29 чэрвеня заявіў, што з пачатку поўнамаштабнага ўварвання расійскае кіраўніцтва ўжо 15 разоў пераносіла тэрміны поўнага захопу Данецкай вобласці. Цяпер яны ўстанавілі новы крайні тэрмін, але і яго ўкраінскі лідар ацаніў як невыканальны.

«З пачатку поўнамаштабнай вайны расійскай арміі ўжо 15 разоў вызначалі тэрміны захопу нашай Данецкай вобласці. Палітычнае кіраўніцтва Расіі пастаянна трызніць Данбасам. Ужо 15 разоў у іх было гэтае наважджэнне — нібыта яны цалкам захопяць Данбас», — сказаў Зяленскі.

Паводле ягоных слоў, у 2022 годзе ўлады РФ пяць разоў прызначалі тэрміны захопу Данбаса: да 31 сакавіка, 9 мая, 1 чэрвеня, 15 верасня і 31 снежня. У 2023 годзе гучалі дзве даты — 1 сакавіка і 31 снежня, у 2024-м — яшчэ дзве.

«У 2025 годзе, калі расіяне спрабавалі пераканаць прэзідэнта [ЗША] Трампа, што Украіна нібыта ўпадзе, было ўжо тры тэрміны — крайнія даты для захопу Данецкай вобласці: да 1 верасня, да 1 снежня і да 25 снежня. І ўжо ў гэтым годзе расіяне зноў пераносілі дату захопу Данецкай вобласці. Спачатку ў іх быў тэрмін да 31 сакавіка гэтага года, затым — да 1 верасня, а цяпер крайні тэрмін устаноўлены на 31 снежня», — заявіў Зяленскі.

Ён дадаў, што, калі Расія працягне вайну, гэты тэрмін таксама давядзецца пераносіць.

«Калі Пуцін хоча пакласці яшчэ мільён сваіх салдат, каб працягваць біцца аб гэтую сцяну, дык мільёну тых расіян, якія пакуль яшчэ не мабілізаваныя ў расійскую армію і сварацца ў чэргах за бензінам, варта падумаць, што іх чакае далей», — сказаў украінскі лідар.

Палітык падкрэсліў, што Украіна ўжо прадставіла «ўсе прапановы», неабходныя для заканчэння вайны, але Расія кожны раз іх адхіляе.

«Напярэдадні зноў прагучала выразнае жаданне Расіі працягваць ваяваць. Значыць, трэба ствараць як мага больш перашкод для гэтага жадання працягваць вайну», — рэзюмаваў Зяленскі.

Нагадаем, напярэдадні прэзідэнт РФ Уладзімір Пуцін заявіў, што Расія не пойдзе на прапановы абмежаваць баявыя дзеянні чатырма часткова акупаванымі рэгіёнамі Украіны і адмовіцца ад удараў у глыб тэрыторый абедзвюх краін. Паводле ягоных слоў, галоўнай задачай расійскай арміі застаецца «канчатковае вызваленне Данбаса і Наварасіі», а ў Сумскай і Харкаўскай абласцях расійскія войскі працягваюць ствараць «зону бяспекі».