Нэтаньягу прадставіў новага кіраўніка Масада родам з Беларусі
- 3.06.2026, 7:57
Раман Гофман нарадзіўся і пражыў да 14 гадоў у беларускім Мазыры.
Прэм’ер-міністр Ізраіля Біньямін Нэтаньягу лічыць, што іранскі рэжым «асуджаны на сыход». Ён паабяцаў, што вайскоўцы яго краіны дапамогуць іранцам у гэтым. Менавіта з гэтых слоў прэм’ер пачаў цырымонію прывітання новага кіраўніка ізраільскай разведкі Масад Рамана Гофмана.
Па словах Нэтаньягу, новы кіраўнік Масада «прабіў сабе шлях самастойна і пераадолеў усе цяжкасці». Са свайго боку The Times of Israel адзначае, што Раман Гофман «заняў гэтую пасаду пасля працяглых юрыдычных абскарджанняў прызначэння».
Што сказалі Нэтаньягу і Гофман
«Гэты рэжым тэрору, лёс якога — сысці з гэтага свету. І мы дапаможам яму дасягнуць гэтай мэты — больш не пагражаць нам ядзернымі бомбамі і тысячамі смяротных балістычных ракет. Гэта мая дырэктыва кіраўніку Масада», — цытуе выданне словы Нэтаньягу. Пры гэтым The Times of Israel адзначае, што гэтую дырэктыву ізраільскі прэм’ер даў разведчыкам на мінулай цырымоніі развітання з Давідам Барнеа, які пайшоў у адстаўку з пасады кіраўніка Масада.
Па словах Нэтаньягу, «Раман прабіў сабе шлях самастойна і пераадолеў усе цяжкасці», — менавіта таму «пасля многіх гадоў яго кар’еры ў войску» прэм’ер раней абраў яго сваім ваенным сакратаром.
«Гэта твая місія, Раман. Масад будзе і далей стаяць на перадавой нашай барацьбы супраць іранскай агрэсіі... У адпаведнасці з паслядоўнай палітыкай, якую мы праводзім гадамі, мы не дазволім іранскаму рэжыму павярнуць час назад. Мы не дазволім яму атрымаць ядзерную зброю і не дазволім яму пагражаць нашаму існаванню», — сказаў Нэтаньягу, звяртаючыся да Гофмана.
У сваю чаргу Раман Гофман адзначыў, што «стратэгічны паварот, які мы здзейснілі супраць іранскай восі» праз ваенныя дзеянні Ізраіля супраць Тэгерана і яго прыспешнікаў, «ужо змяніў баланс сіл ва ўсім рэгіёне».
«Але задача яшчэ не завершана. Сутнасць Масада — у таемных аперацыях супраць дзейнасці тэрарыстаў. Мы працягнем гэтую місію любой цаной», — паабяцаў ён.
Хто такі Гофман
Раман Гофман (жанаты, бацька траіх дачок) лічыцца першым рускамоўным кіраўніком Масада. Справа ў тым, што Раман нарадзіўся (у лістападзе 1976 года) і правёў усё дзяцінства і частку юнацтва ў беларускім Мазыры.
Аднак цяпер ён — генерал-маёр Арміі абароны Ізраіля (ЦАХАЛ), а апошнім часам (з мая 2024 года) быў ваенным сакратаром прэм’ер-міністра.
У Ізраіль Раман Гофман рэпатрыяваўся разам з бацькамі ў 1990 годзе, і амаль адразу юнак пачаў будаваць вайсковую кар’еру — паступіў у вайсковы інтэрнат, прайшоў тэрміновую службу ў ЦАХАЛ (у 1995 годзе, у бранятанкавых войсках Арміі абароны Ізраіля), скончыў афіцэрскія курсы і застаўся ў войску.
Званне брыгаднага генерала Раман Гофман атрымаў у 2019 годзе — у той час ён камандаваў дывізіяй «Ха-Башан». Аднак у 2022 годзе Гофман перадаў дывізію іншаму генералу, а сам стаў камандзірам Нацыянальнага цэнтра вучэнняў сухапутных войскаў.
У кастрычніку 2023 года, падчас масавага ўварвання баевікоў ХАМАС з сектара Газа ў Ізраіль, ён разам са сваім кіроўцам па ўласнай ініцыятыве паехаў у Сдэрот, дзе ўжо былі тэрарысты. Ён (разам з атрадам добраахвотнікаў паліцыі) увайшоў у бой з баевікамі і быў паранены. Лічыцца, што менавіта праз гэтыя падзеі ён трапіў у поле зроку Нэтаньягу — так ці інакш, ужо ў красавіку 2024 года апошні прызначыў Гофмана на пасаду ваеннага сакратара прэм’ер-міністра Ізраіля.