«Беганіна з «акашкай» без магазіна будзе для Лукашэнкі як дзіцячы ляпет»

• 3.06.2026, 11:43

У Кіеве жорстка адказалі на словы дыктатара.

Днямі Аляксандр Лукашэнка пракаментаваў заяву камандуючага Сіламі беспілотных сістэм Украіны Роберта Мадзяра Броўдзі пра тое, што ў іх «на алоўку» ўжо ёсць першыя 500 мэт у Беларусі. Дыктатар заявіў, што мае адну мэту ва Украіне. Верагодна, гаворка ішла пра Офіс Уладзіміра Зяленскага. Пра тое, як ва Украіне ўспрынялі гэтыя словы, у інтэрв’ю «Зеркалу» расказаў саветнік кіраўніка Офіса Прэзідэнта Украіны Міхайла Падаляк.

На думку Міхайлы Падаляка, адказ Аляксандра Лукашэнкі на словы Роберта Мадзяра Броўдзі мае, «напэўна, прапагандысцкае значэнне». Калі ж ён вырашыць уступіць у вайну, то ўсё будзе выглядаць для яго зусім інакш.

— Тады беганіна з паўпустым аўтаматам, ці, дакладней, там з «акашкай» без магазіна, — гэта будзе дзіцячы ляпет, — перакананы Міхайла Падаляк і прапануе падрабязней спыніцца на пытанні. — Першае: мы бачым эскалацыйныя рызыкі па паўночным напрамку. Маецца на ўвазе з тэрыторыі Беларусі. Мы адзначаем пэўныя дзеянні, наша выведка іх фіксуе. Гэта і перадыслакацыя пэўных вайсковых частак, і максімальна хуткае будаўніцтва лагераў уздоўж мяжы, [а таксама] лагістыкі, дарог і гэтак далей. Што ў сувязі з гэтым кажуць нашы вайскоўцы? Яны вельмі дакладна заяўляюць: калі толькі адтуль зноў пачнуць пускаць дроны, ракеты, значыць, мы будзем лічыць, што гэта тэрыторыя актыўна ўдзельнічае ў баявых дзеяннях з усімі вынікаючымі наступствамі. Наступствы можна паглядзець на тэрыторыі Расійскай Федэрацыі <�…>. Гэта першае.

Другое: ён (гаворка пра Аляксандра Лукашэнку. — Заўв. рэд.) можа бравіраваць чым заўгодна, але ў нас адпрацаваныя тэхналогіі дальняга дзеяння. Мы бачым, што адбываецца з расійскім нафтавым сектарам. Адпаведна, разумеючы адлегласці ўнутры Беларусі (яны крыху адрозніваюцца ад адлегласцяў у Расіі), дакладна паверце: прастрэльваецца ўся тэрыторыя. І ў выпадку неабходнасці будуць знішчаныя ключавыя аб’екты.

Зноў жа, пакуль гэта рыторыка. Ніхто не кажа, што гэта будзе або не будзе зроблена заўтра. Рыторыка і спадара Броўдзі, і ўсіх астатніх украінскіх вайскоўцаў кажа толькі пра адно: «Падумайце перад тым, як прымаць неабдуманыя крокі». То-бок, ці ўцягвацца ў актыўную фазу баявых дзеянняў.

Мы выдатна разумеем, што Беларусь — гэта не Расія. Мы разумеем, што грамадзяне Беларусі зусім інакш і вайну ўспрымаюць, і разумеюць: тое, што сёння робіць Расія, — гэта жахліва. Яны куды больш выразна ўсведамляюць розніцу паміж мірам і вайной, у адрозненне ад Лукашэнкі, які любіць проста кідацца словамі.

Калі ў Расіі віталі вайну супраць Украіны (яны там у захапленні былі: «Давайце заб’ём», «Давайце яшчэ»), то ў Беларусі, вядома, такіх настрояў не было. Адпаведна, маючы краіну, якая катэгарычна супраць вайны, [перад тым як] пачынаць рабіць нейкія заявы або зноў прадастаўляць сваю тэрыторыю для магчымасці правядзення атакі <�…>, напэўна, трэба крыху задумацца. Як чалавеку асцярожнаму, які хоча дажыць да пенсіі, я ведаю, забяспечыць транзіт улады, дынастыю пабудаваць (я ўсё гэта з сарказмам кажу), тым не менш яму сёння было б пажадана проста маўчаць.