Былы футбаліст беларускай каманды падпісаў кантракт з чэмпіёнам Бундэслігі

• 3.06.2026, 13:31

Іван Дыбанго перайшоў у «ЛАСК» у статусе свабоднага агента.

Апошнім часам у стужцы навін усё часцей з’яўляюцца былыя футбалісты «Іслачы». Нядаўна стала вядома, што экс-нападнік «ваўкоў» Прынс Аду адправіцца на чэмпіянат свету ў складзе зборнай Ганы, а цяпер прыемна здзівіў іншы былы гулец клуба. Камерунец Іван Дыбанго падпісаў кантракт з чэмпіёнам Аўстрыі — «ЛАСКам» з Лінца, піша Onlíner.

Іван пераехаў у Беларусь з Камеруна ў 2021 годзе. Ужо праз год, паводле аналізу платформы Instat, ён апынуўся ў ліку самых таленавітых маладых абаронцаў Еўропы, а потым транзітам праз эстонскую «Левадзію» перайшоў ва ўкраінскі «Крыўбас». У новай камандзе Дыбанго выглядаў нядрэнна: прызнаваўся гульцом месяца, а ў СМІ перыядычна з’яўляліся навіны пра цікавасць да яго з боку клубаў Францыі, Грэцыі, Даніі і іншых краін.

Ва Украіне футбаліст трапіў у незвычайную сітуацыю. У сваім Instagram Дыбанго расказаў, што клуб завінаваціў яму грошы. У чаканні вырашэння пытання ён нават пераначаваў у кабінеце бухгалтара.

«Клуб ужо забраніраваў мне білет на самалёт пасля заўтрашняй гульні, але я не магу з’ехаць адсюль, не атрымаўшы таго, што я зарабіў. Мне завінавацілі заробак, пачынаючы з сакавіка, а таксама бонусы. Я не пайду адсюль без адказу», — сказаў Дыбанго.

У выніку, правёўшы чатыры сезоны ва Украіне, Дыбанго падпісаў кантракт з чэмпіёнам Аўстрыі «ЛАСКам». У новы клуб футбаліст перайшоў у статусе свабоднага агента. Кантракт разлічаны на тры гады.

«З набыццём Івана Дыбанго мы атрымалі фізічна моцнага гульца, універсальнага і здольнага гуляць на левым фланзе як у схеме з пяццю абаронцамі, так і ў схеме з чатырма абаронцамі. Ён не толькі валодае выдатнымі навыкамі адбору мяча і абарончымі здольнасцямі, але і часта падключаецца да атакі, здольны ўплываць на ход гульні. Мы з вялікай цікавасцю сачылі за яго развіццём і рады, што Іван вырашыў далучыцца да нас», — паведаміў спартыўны дырэктар ЛАСКа Дзіно Бурыч.