Польшча падоўжыла дзеянне буфернай зоны на мяжы з Беларуссю
- 3.06.2026, 16:00
У Варшаве заявілі пра неабходнасць захоўваць аператыўную пільнасць.
Дзеянне буфернай зоны на польска-беларускай мяжы падоўжана яшчэ на тры месяцы — з 3 чэрвеня па 31 жніўня 2026 года, паведамляе Міністэрства ўнутраных спраў і адміністрацыі Польшчы (МУСіА).
«Рашэнне звязана з неабходнасцю падтрымання максімальнай аператыўнай пільнасці і высокай эфектыўнасці аховы мяжы», — адзначае ведамства.
Папярэдні раз дзеянне буфернай зоны было падоўжана таксама на тры месяцы — з 5 сакавіка 2026-га, піша «Позірк».
Як раней адзначалася на сайце МУСіА, функцыянаванне буфернай зоны «звязана з міграцыйным ціскам з боку Беларусі». Паведамлялася, што «буферная зона служыць для абароны дзяржаўнай мяжы і барацьбы з кантрабандыстамі, якія на польскім баку забіраюць людзей, што спрабуюць незаконна перайсці мяжу».
Ведамства адзначала, што забарона на знаходжанне на пэўнай тэрыторыі ў прыгранічнай зоне, прылеглай да дзяржаўнай мяжы з Беларуссю, дзейнічае з 13 чэрвеня 2024 года і падаўжаецца кожныя 90 дзён.
Удакладнялася, што зона, на якую распаўсюджваецца забарона, будзе ахопліваць участак мяжы даўжынёй больш за 78 км, размешчаны ў межах адказнасці памежных застаў у Міхалове, Нарэўцы, Белавежы, Дубічах-Царкоўных і Чарэмсе (Падляскае ваяводства).
На ўчастку каля 59 км тэрыторыя, ахопленая забаронай, складае 200 м ад лініі дзяржаўнай мяжы. На ўчастку больш за 15 км, размешчаным у раёне прыродных запаведнікаў, шырыня зоны складае каля 2 км, а на ўчастку каля 4 км яе шырыня ў глыб краіны дасягае прыблізна 4 км.
«Мы з задавальненнем назіраем змяншэнне міграцыйнага ціску, але на дадзеным этапе не лічым гэта ўстойлівым працэсам, і таму будзем ужываць усе меры, якія дазволілі нам спыніць незаконную міграцыю па гэтым маршруце», — заяўляў намеснік міністра Чэслаў Мрочек.
«За два гады ўрад вылучыў амаль 3 млрд злотых (каля 830 млн долараў) на ўзмацненне аховы польска-беларускай мяжы. Мы пабудавалі фізічную агароджу даўжынёй 190 км і запусцілі электронную агароджу на ўчастках рэк Буг, Свіслач і Істачанка агульнай працягласцю амаль 220 км. Дзякуючы гэтым мерам абароненасць мяжы павялічылася да 98%», — паведамлялася на сайце ведамства.