Пра паражаныя мэты пад Масквой
- Аляксей Копыцька
- 30.06.2026, 13:51
А шкода можа быць каласальная.
Не збіраўся гэтага пісаць, але зранку адкрыў стужкі і заўважыў незадаволенае бурчанне. Маўляў, неэфектна і неэфектыўна выглядае праца добрых дронаў у Маскоўскай вобласці.
Шмат відэа, як іх збіваюць, нічога прыгожа не дыміць. Можа, спыніць гэтыя потугі і спаліць які-небудзь лішні НПЗ? І карысна, і настрой падымае. А не вось гэта ўсё.
Вынікі ночы 29/30 чэрвеня будуць пазней, ужо ёсць намёкі ў выглядзе двух акуратных узгаранняў у раёне Дубны. І гэта добрая нагода паглыбіцца.
1. Спецыфіка Маскоўскай вобласці ў тым, што там мноства найважнейшых мэтаў, дзе асабліва няма чаму прыгожа і доўга гарэць. А шкода можа быць каласальная.
Мы ўжо прывыклі мераць эфектыўнасць шматдзённымі пажарамі на нафтабазах і працяглай другаснай дэтанацыяй на складах боепрыпасаў.
Аднак на заводах ВПК, што вырабляюць высокатэхналагічныя, але не выбуховыя элементы, такога не будзе. Таксама і на аб’ектах сувязі, радыётэхнічнай разведкі, касмічнай галіны, у цэнтрах кіравання і г. д.
Цэнтр касмічнай сувязі «Дубна» — адзін з такіх прыкладаў. Але нават ён не самы наглядны. Хоць, здавалася б?!
2. 29 чэрвеня ў зводцы Генштаба мільгануў такі абзац: «Акрамя таго, па выніках дадатковага аналізу дадзеных пацверджана паражэнне двух аб’ектаў праціўніка ў раёне н.п. Миняево Маскоўскай вобласці РФ, якія забяспечвалі ваенную сувязь. На тэрыторыях аб’ектаў 26 чэрвеня знішчаны адзін будынак. Яшчэ адзін будынак атрымаў значныя пашкоджанні з яго частковым разбурэннем…».
У сетцы ёсць пара спадарожнікавых здымкаў, дзе паказана: адно збудаванне (ангар) сапраўды разбурана, а ў другога (П-падобнага, 3+ павярховага) абвалілася палова «перакладзіны» па ўсёй вышыні, г. зн. разбурана прыблізна 1/6 частка збудавання…
Ці добра гэта, ці дрэнна — незразумела. Бо дадзеная інфармацыя нічога не тлумачыць, а больш хавае. Калі вы паспрабуеце знайсці якіясьці аб’екты па арыенціры «н.п. Миняево», амаль нічога не будзе.
Зусім іншая справа, калі пачнеце шукаць па арыенціры «Мещерино». Тут і разверзнецца пячора Аладзіна, з якой трэба толькі дастаць каштоўнае…
3. У 1950-я гг. савецкі ўрад пачаў будаваць вакол Масквы непрыступную крэпасць, у тым ліку — у плане супрацьпаветранай абароны.
Для абслугоўвання гэтай мэты былі пабудаваны Малае і Вялікае маскоўскія кольцы. Па сутнасці — гэта яшчэ дзве кальцавыя дарогі, на адлегласці прыблізна 30 км і 60 км ад МКАД, якія выконваюць функцыю ракадных ваенных маршрутаў.
На акружнасці гэтых кольцаў (спачатку закрытых для простых абывацеляў) былі выбудаваныя два эшалоны СПА. У прыватнасці, па Вялікім кольцы ў цікавым для нас раёне (паўднёва-ўсходні сектар, паміж трасамі М-4 і Е-30) з крокам у 15 км «рассадзілі» зенітна-ракетныя палкі/дывізіёны, першапачаткова ўзброеныя спецыяльна створанымі сістэмамі С-25, якія ў сярэдзіне 1980-х гг. замянілі на ЗРК С-300/С-300П.
Паводле традыцыі тых гадоў, для забеспячэння жыццядзейнасці вайсковай часткі быў пабудаваны закрыты ваенны гарадок «Мещерино-1» у 2,5 км на поўдзень ад уласна н.п. Мещерино (тэхнічна бліжэй да дачнага пасёлка Миняево).
Пасля распаду СССР пачаўся працэс рэарганізацыі арміі, у тым ліку сіл СПА, у выніку чаго 709-ы зенітна-ракетны полк асаблівага прызначэння з адрасам «Мещерино-1» быў скарочаны. Да 1995 года гісторыя вайсковай часткі СПА там скончылася, засталіся гаротна існаваць людзі ў ваенным гарадку, які пачаў развальвацца. Увогуле, уся класіка 1990-х…
Аднак СПА — гэта толькі адна складовая «Мещерино-1». У пачатку 1970-х гадоў побач з пазіцыямі СПА перазапусцілі будовыю ваенна-тэхнічнага аб’екта, якую пачыналі ў 1960-х, але з-за шпіёнскага скандалу адклалі.
Каб не паглыбляцца ў фармальныя дэталі, сутнасць: у «Мещерино-1» сфармавалася высокатэхналагічнае гняздо савецкай ваеннай разведкі ГРУ (цяпер ГУ ГШ Узброеных Сіл РФ), якое займалася касмічнай разведкай і разведкай на іншых электронных каналах камунікацыі.
4. Цяпер мы можам назіраць, як ствараюцца і рэарганізуюцца вайсковыя часткі і цэлыя роды войскаў. Таму няма асаблівага сэнсу зацыклівацца на ўсіх нумарах частак і юрыдычных асобах. Але варта зафіксаваць, што пасля пэўнага заняпаду ў пачатку 1990-х адбыўся невялікі рэнесанс радыётэхнічных падраздзяленняў у структуры ГРУ, якія займаліся РЭР і РЭБ.
Прычына — войны ў Чачні. Раптам высветлілася, што патрэбныя спецыялісты для перахопу спадарожнікавых сігналаў, узлому абсталявання замежнай вытворчасці і г. д. Тыя ж людзі займаліся, у тым ліку, і прыглушэннем сігналу пры нейтралізацыі выбуховых прылад.
У пачатку 2000-х радыётэхнічныя разведпадраздзяленні ГРУ былі пераўтвораны ў Цэнтры / Цэнтральныя пункты прыёму і апрацоўкі інфармацыі.
На дадзены момант з лакацыяй «Мещерино-1» звязаныя:
• Федэральная казённая ўстанова «Вайсковая частка 03770», яна ж — 476-ы цэнтральны пункт прыёму і апрацоўкі інфармацыі ГУ ГШ (адзін персанаж з гэтага цэнтра нават стаў персонай нон грата ва Украіне ў 2018 г.);
• ФКУ «Вайсковая частка 47126», яна ж 918-ы цэнтральны пункт прыёму і апрацоўкі інфармацыі ГУ ГШ;
• ФКУ «Вайсковая частка 30258».
У многім — гэта спалучаныя пасудзіны. Вельмі наглядна гэта відаць на прыкладзе в/ч 30258 і 03770 — у іх нават сумесныя форумы бацькоў салдат. А ў сілу закрытасці частак узнікае блытаніна: хто дзе служыць, што гэта за войскі і г. д. Базавае прыкрыццё — што гэта часткі Касмічных войскаў ВКС РФ. Але не. У гэтых частак характэрная для ГРУ сімволіка на разнастайных значках.
5. Вынік: у ноч на 26 чэрвеня Сілы абароны Украіны без асаблівага рэзанансу крыху патапталі ваенна-касмічнае гняздо ГРУ з прывязкай да «Мещерино-1». Акрамя тактычнага значэння ў ходзе цяперашняй вайны ўзнікае дадатковы — стратэгічны — момант.
У Расіі касмічныя справы ідуць не надта бліскуча, аднак Крэмль валодае значнай групіроўкай ваенных і фармальна грамадзянскіх спадарожнікаў, застаючыся адным з лідараў асваення космасу.
Гэтыя спадарожнікі замыкаюцца на наземную інфраструктуру. Пра цэнтры касмічнай сувязі («Дубна», «Уладзімір» …) я ўжо пісаў, нашы іх крыху паламалі.
Да гэтага 30 мая паламалі радыётэхнічны аб’ект 16-га Цэнтра ФСБ РФ у раёне Темрюка. А цяпер вось і да ГРУ дабраліся. Звярніце ўвагу — усё гэта літаральна за 1 месяц.
Гэта, скажу вам, будзе страшней за падпальванне бочак з нафтай.
Адзіночныя ўдары па такіх аб’ектах зменяць няшмат, бо часта самае цікавае, уразлівае і непапраўнае там — пад зямлёй. Але Украіна ўжо абазначыла, што ўдары будуць не адзіночныя. У выніку чаго Расія за некалькі месяцаў можа стратэгічна асляпнуць і аглухнуць, страціўшы значную частку вялікадзяржаўя.
Упэўнены, што расійскія вайскоўцы, Раскасмас і ФСБ змогуць абазначыць перад палітычным кіраўніцтвам такую рызыку.
Схаваць такія аб’екты ад нас расіяне не могуць. Бо львіная іх доля разгорнутая на савецкай базе. А нешта зусім новае нашы спецыялісты выяўляюць…
А вы кажаце, ненаглядна, не дыміць, выглядае як нейкая дурасць…
Цаніце разнастайнасць ваенных мэтаў.
Аляксей Копыцька, «Фэйсбук»