Раскрыта таямніца дасягнення сапраўднай шматзадачнасці

• 4.06.2026, 16:13

Мазгу патрэбныя трэнаванні.

Навукоўцы з Джорджтаўнскага ўніверсітэта высветлілі, што пасля інтэнсіўнага навучання мозг можа перабудоўваць свае нейронныя сеткі такім чынам, каб выконваць некалькі задач адначасова. Вынікі даследавання апублікаваныя у Journal of Cognitive Neuroscience (JCN).

Даследчыкі вывучалі, як мозг аўтаматызуе добра засвоеныя навыкі. Для гэтага добраахвотнікі на працягу пяці–дзесяці тыдняў выконвалі больш за 30 тысяч трэнінгавых заданняў па распазнаванні і сартаванні выяў аўтамабіляў. Да і пасля навучання навукоўцы аналізавалі актыўнасць іх мозгу з дапамогай функцыянальнай МРТ і электраэнцэфаляграфіі.

На пачатковым этапе выканання задачы актыўна працавала прэфрантальная кара — вобласць мозгу, якая адказвае за ўвагу, прыняцце рашэнняў і іншыя выканаўчыя функцыі. Аднак пасля некалькіх тыдняў трэнінгаў апрацоўка інфармацыі перамясцілася ў скроневую кару, звязаную з памяццю і распазнаваннем складаных аб'ектаў.

Паводле слоў аўтараў працы, гэта дазволіла разгрузіць прэфрантальную кару ад часткі нагрузкі. У выніку ўдзельнікі маглі адначасова выконваць дадатковую задачу без прыкметнага пагаршэння вынікаў.

Даследаванне паказала, што па меры назапашвання досведу мозг стварае новыя нейронныя шляхі, якія дазваляюць выконваць добра знаёмыя дзеянні практычна аўтаматычна. Чым мацней задача «перамяшчалася» з прэфрантальнай кары ў спецыялізаваныя вобласці мозгу, тым лепш людзі спраўляліся з паралельнай дзейнасцю.

Аўтары лічаць, што атрыманыя даныя дэманструюць існаванне сапраўднай шматзадачнасці, якая ўзнікае дзякуючы працягламу навучанню і перабудове мазгавых сетак. На іхнюю думку, гэты механізм можа тлумачыць працу экспертаў у розных галінах — ад кіроўцаў і спартсменаў да ўрачоў-рэнтгенолагаў, якія здольныя хутка прымаць рашэнні, не трацячы значных кагнітыўных рэсурсаў на руцінныя аперацыі.

Вынікі даследавання таксама могуць аказацца карыснымі для распрацоўкі сістэм штучнага інтэлекту, здольных выкарыстоўваць раней назапашаны досвед для аўтаматызацыі складаных задач.