Чаму адным беларусам даюць шэнген на месяц, а іншым — на пяць гадоў?

• 4.06.2026, 18:04

Тураператар растлумачыў.

Калі гэтым летам вы плануеце паездку ў краіны Шэнгенскай зоны, тэрмін дзеяння візы ў многім будзе залежаць ад вашай візавай гісторыі. Адзін з вядучых аўтобусных тураператараў расказаў, на які час цяпер часцей за ўсё выдаюць візы ў пасольствах, перадае Рэспубліканскі саюз турыстычных арганізацый (РСТО).

Аднымі з самых шчодрых на доўгатэрміновыя візы застаюцца Італія і Францыя. У італьянскім консульстве ўладальнікам чыстага пашпарта звычайна выдаюць візу на тэрмін паездкі або прыкладна на месяц. Пры наяўнасці візавай гісторыі тэрмін можа павялічыцца да некалькіх месяцаў або года. А турысты, якія раней ужо атрымлівалі доўгатэрміновыя італьянскія або іншыя шэнгенскія візы, могуць разлічваць на візы тэрмінам на два, тры і нават пяць гадоў.

У Францыі заяўнікам без візавай гісторыі часцей выдаюць візу на канкрэтную паездку або на месяц з трохмесячным калідорам. Калі ж у пашпарце ўжо ёсць шэнгенскія візы, нярэдка можна атрымаць дазвол на паўгода.

Грэцыя ў большасці выпадкаў афармляе візы пад даты паездкі, аднак лічыцца адной з самых прадказальных краін з пункту гледжання адабрэння заявак.

Іспанія і Нарвегія часцей ідуць насустрач падарожнікам, у якіх за апошнія тры гады ўжо было некалькі шматразовых віз. У такіх выпадках шанцы атрымаць візу на больш працяглы тэрмін значна павялічваюцца.

У Венгрыі і Славакіі заяўнікам без візавай гісторыі або з мінімальным досведам паездак звычайна выдаюць аднаразовыя візы. Пры станоўчай візавай гісторыі можна разлічваць на шматразовую шэнгенскую візу тэрмінам ад шасці месяцаў да двух гадоў.

«Паводле звестак консула: першыя дзве візы — кароткія; калі візы былі выкарыстаныя па прызначэнні — атрымаеце візу на год і болей», — паведаміў тураператар.

Адзначаецца, што на атрыманне шматразовай візы ў значнай ступені ўплывае візавая гісторыя заяўніка. Калі за апошнія тры гады ў чалавека было толькі адна-дзве кароткатэрміновыя візы, найчасцей яму зноў выдадуць візу на невялікі тэрмін. Разам з тым наяўнасць некалькіх доўгатэрміновых шэнгенскіх віз значна павышае шанцы на атрыманне дазволу на ўезд тэрмінам на год, два гады і болей.

Пры гэтым консульствы ўважліва ацэньваюць, наколькі карэктна выкарыстоўваліся папярэднія візы — строга па прызначэнні і без парушэння правілаў.