Беларус адмовіўся ад вайсковых збораў з-за рэлігіі

• 4.06.2026, 19:20

Што вырашыў суд.

У Мінску асудзілі мужчыну, які адмовіўся ехаць на вайсковыя зборы па рэлігійных перакананнях.

Падрабязнасці крымінальнай справы супраць 38-гадовага мінчука паведамілі агенцтву «Мінск-Навіны» ў пракуратуры Першамайскага раёна сталіцы.

7 кастрычніка 2025 года мужчына атрымаў позву на вайсковыя зборы. Пры ўручэнні ён распісаўся, што азнаёмлены з магчымымі крымінальнымі і адміністратыўнымі наступствамі няяўкі.

У прызначаны дзень ваеннаабавязаны прыйшоў у ваенкамат, але не з рэчамі, а з заявай. Удзельнічаць у зборах ён не можа, бо ваенная служба супярэчыць яго рэлігійным перакананням.

Супраць мужчыны ўзбудзілі крымінальную справу за ўхіленне ад з’яўлення на вайсковыя зборы.

Суд прызнаў яго вінаватым паводле ч. 1 арт. 436 КК Рэспублікі Беларусь (ухіленне рэзервіста або ваеннаабавязанага ад з’яўлення на зборы або заняткі).

Як паведамілі ў пракуратуры Першамайскага раёна, абвінавачаны працуе грузчыкам, жанаты і раней да крымінальнай адказнасці не прыцягваўся.

Мужчыне прысудзілі паўгода папраўчых работ. Акрамя таго, з яго заработнай платы будуць утрымліваць 20% у даход дзяржавы (але не менш за адну базавую велічыню штомесяца).