У Крэмля скончылася пяхота

• Аляксандр Карпюк
• 5.06.2026, 9:27

Чаму РФ не зможа разгарнуць наступленне летам.

Сустрэў сёння думку пра поспехі расіян на фронце, маўляў, «ну яны ж павольна, але рухаюцца»...

Так, гэта праўда. Пакуль што. Але заўсёды ёсць «але».

Калі памятаеце, раней я пісаў, што для нашых падраздзяленняў адной з праблем лета стане ліства на дрэвах. І гэта праўда. Бо кроны дрэваў вельмі дапамагаюць тактыцы пранікнення, калі дронам складана разгледзець у пасадках расіян.

Але каб пранікаць — патрэбна пяхота, з разлікам, што з дзесяці ў лепшым выпадку дойдзе адзін кудысьці да нашых пазіцый.

А з пяхотай усё дрэнна, ды і яна цяпер не ў тых кандыцыях, што раней. Бо калі ў цябе гэтай пяхоты меней, чым трэба для неабходнага ціску на лінію, то пяхота пачынае або ўвогуле не даходзіць, або даходзіць даволі рэдка.

Магу сказаць, што ў расіян ёсць праблемы з пяхотай. Учора літаральна размаўляў са сваімі хлопцамі, і яны наўпрост сказалі, што біямасы стала меней. Калі раней у канкрэтнай пасадцы знішчалі пяцёх, то цяпер, калі там жа за той жа перыяд часу знішчаюць 1–2, гэта нават нядрэнна для цяперашняга часу. І пры гэтым яны ўсё адно не даходзяць да пункта штурму.

Той сектар, па якім яны імкнуцца ісці каля Пакроўска, я выдатна ведаю. Я там жыў побач амаль чатыры гады. Там вельмі складаная зона для нашых дроншчыкаў. Там густыя пасадкі, шмат закінутых дамоў у разбітых пасёлках, дзе лёгка хавацца і накаплівацца, і даволі складаны рэльеф. Калі б у расіян было столькі ж пяхоты, як год таму, мы б бачылі значна горшую карціну.

І гэта з улікам таго, што расіяне знялі шмат сілаў з іншых напрамкаў, каб наращваць ціск у бок Славянска, каб выканаць план па захопе Данецкай вобласці. Але сілаў не стае. І іх становіцца ўсё меней, што яшчэ накладаецца на пачатак калапсу ў лагістыцы, і што з гэтым рабіць сёння — яны не ведаюць.

У РФ пачынаюць схаваную мабілізацыю, але нават так, каб назапасіць неабходнае мяса, патрэбны час. А яны цяпер у такой сітуацыі, калі мяса трэба прама цяпер, бо тэрміны па захопе Данецкай вобласці ціснуць, развіццё беспілотных падраздзяленняў у ЗСУ паказвае, што потым будзе яшчэ горш, фінансавыя праблемы ў РФ не дазваляюць гуляць доўгатэрмінова, а восень–зіма з улікам пагодных умоў яшчэ дададуць санітарных праблем.

Калі раней тылы зімой былі абароненыя ад ударных крылаў аблокамі на вышыні 100–200 м, то сёння нашы крылы масава паспяхова лётаюць на такіх вышынях. Значыць, рэзаць лагістыку будуць яшчэ і зімой і больш актыўна, чым раней.

Пакуль таго, што яны сканцэнтравалі, хапае, каб патроху праціскацца па складанай для нас мясцовасці, але людзі відавочна заканчваюцца. Гэта добры знак. Гэта азначае, што мы блізкія да таго, каб нарэшце стабілізаваць лінію, выкапаць стабільныя пазіцыі і весці агонь з неба па акупаваных і расійскіх тэрыторыях, маючы пастаянную лінію судакранання. А гэта будзе азначаць поўнае фіяска для расійскіх планаў.

Дык што так, пакуль што поспехі ў іх ёсць. Але тэндэнцыя пакуль не на іх карысць, нават з улікам камфортных пагодных умоў для штурмаў. Будзем спадзявацца, што гэтыя тэндэнцыі не зменяцца.

Аляксандр Карпюк «Фэйсбук».