Андрэй Сібіга: На фронце ў нас наймацнейшыя пазіцыі за год
- 5.06.2026, 17:51
Цяпер мяч на баку расіян.
Адкрыты ліст прэзідэнта Уладзіміра Зяленскага Уладзіміру Пуціну таксама з’яўляецца шанцам для расійскага дыктатара завяршыць вайну, улічваючы моцную перагаворную пазіцыю Украіны на дадзены момант. Пра гэта заявіў міністр замежных спраў Андрэй Сібіга ў эфіры тэлемаратону, піша Liga.net.
4 чэрвеня Зяленскі нечакана звярнуўся да Пуціна з адкрытым лістом, прапаноўваючы сустрэчу і перамір’е. У прыватнасці, ён ударыў па рэпутацыі дыктатара, указаўшы на ваенныя няўдачы Расіі, эканамічныя праблемы і залежнасць ад Кітая. Ліст з’явіўся на фоне паспяховых украінскіх удараў ўглыб Расіі і паражэнняў расіян на фронце.
Кіраўнік МЗС упэўнены, што гэты дакумент цяпер таксама аналізуюць і вывучаюць у Расіі. Ён адзначыў, што ў дзень публікацыі ліста атрымаў даручэнне ад Зяленскага перадаць гэты зварот па дыпламатычных каналах, а таксама яго зарэгістравалі і распаўсюдзілі на пляцоўках міжнародных арганізацый, уключаючы ААН, Раду Еўропы і АБСЕ.
«Пасыл у гэтым лісце – пра рэальную сітуацыю, у якой сёння знаходзімся мы і ў якой знаходзіцца Расія. Бо гэта таксама шанец для Расіі скончыць гэтую вайну ў кароткатэрміновай перспектыве. Улічваючы тое, што адбываецца на полі бою, улічваючы эканоміку Расіі. І прэзідэнт Зяленскі дае аб’ектыўную карціну, якую, мы спадзяёмся, таксама прачытае прэзідэнт Пуцін. У адрозненне ад тых псеўдадакладоў, бравурных дакладаў, якія яму падае яго бліжэйшае атачэнне», – патлумачыў Сібіга.
Ён адзначыў, што Кіеў хоча завяршыць вайну – і мае рэальныя мірныя прапановы і ведае, як «дасягнуць годнага, справядлівага міру».
Чыноўнік таксама заявіў пра «прабуксоўку» ў мірных намаганнях з-за таго, што амерыканскі бок пераарыентаваў сваю ўвагу на Блізкі Усход.
Аднак, падкрэсліў міністр, Украіна «не мае часу марудзіць» і хоча «падтрымліваць высокую дынаміку перагаворнага працэсу».
«І пра гэта прэзідэнт Зяленскі ясна адзначае ў сваім лісце. Цяпер мяч на баку расіян. Бо Украіна чарговы раз публічна паказала сваю пазіцыю: мы гатовыя заканчваць вайну дыпламатычным спосабам, маючы сёння на полі бою наймацнейшыя пазіцыі за апошні год», – патлумачыў Сібіга.
Ён адзначыў, што цяпер Кіеў «істотна нарастіў» сваю перагаворную пазіцыю дзякуючы мужнасці абаронцаў, асіметрычным атакам («спецыяльным далёкабойным санкцыям»), унікальнай украінскай экспертызе па супрацьпаветранай абароне і ўменню вайскоўцаў збіваць расійскія мэты.
На думку міністра, з боку расійскага дыктатара «было б разумна прыняць гэту прапанову... не хавацца і сустрэцца».
Ён таксама назваў «абсурднымі» і «непрымальнымі» чарговыя расійскія прапановы да Зяленскага прыехаць на перамовы ў Маскву.
«Гэта чарговая маніпуляцыя, чарговая спроба пазбегнуць гэтай сустрэчы. Сустрэча сапраўды можа прывесці да набліжэння міру. І ў гэтым цяпер зацікаўленыя, у тым ліку і перадусім, расіяне», – патлумачыў кіраўнік украінскай дыпламатыі.