Сібіга: Пуцін упусціў свой шанец
- 6.06.2026, 16:17
Паразы Крэмля стануць усё больш прыніжальнымі.
Міністр замежных спраў Украіны Андрэй Сібіга лічыць, што адмова ініцыятара вайны Пуціна пагадзіцца на прамыя перамовы з прэзідэнтам Украіны Уладзімірам Зяленскім абернецца для крэмлёўскага дыктатара дрэннымі наступствамі.
Як падкрэсліў кіраўнік МЗС у сетцы X, няма ніякіх добрых навін для расіян, піша «УНІАН».
– Адхіліўшы прапанову прэзідэнта Зяленскага аб прамых мірных перамовах, Пуцін упусціў свой шанец выйсці з гэтай правальнай для яго вайны, – адзначыў Сібіга.
Па яго перакананні, далей для Расіі ўсё будзе толькі горш, бо страты на полі бою будуць няўхільна расці, а паразы стануць усё больш прыніжальнымі.
– Эканоміка пагрузіцца яшчэ глыбей у рэцэсію. Будзе страчана больш працоўных месцаў, падаткі будуць расці, а інфляцыя ўдарыць па найменш абароненых пластах насельніцтва, – падкрэсліў Сібіга
Дальнабойныя ўдары ў расійскім тыле будуць узмацняцца
У той жа час, як адзначыў міністр, у Расіі ўжо няма бяспечных месцаў, якія не падвяргаюцца дальнабойным санкцыям Украіны. І іх інтэнсіўнасць будзе толькі расці.
Разам з тым міжнародны ціск не аслабне – ён будзе толькі ўзмацняцца. У прыватнасці, гэта будзе ўключаць выкарыстанне замарожаных актываў, забароны на ўезд і непазбежную адказнасць за злачынствы.
Пуцін не дасягне сваёй мэты ў вайне супраць Украіны
– Усё гэта таму, што крэмлёўскі фанатык імкнецца любой цаной утрымацца пры ўладзе і гатовы ахвяраваць будучыняй уласнай краіны і забіць мільёны людзей дзеля сваіх вар’яцкіх ілюзій, – заявіў кіраўнік МЗС.
Таксама, паводле слоў міністра, усё гэта таму, што Пуцін не хоча прызнаць простую ісціну: ён ніколі не дасягне сваіх мэтаў на полі бою.
– Яму лепш адмовіцца ад марных надзей на падзенне Украіны, змяншэнне падтрымкі з боку яе партнёраў або аслабленне ціску на Расію, – заявіў міністр.
Як лічыць Сібіга, Расіі ўсё адно давядзецца пагадзіцца на дыпламатычнае ўрэгуляванне, але ўмовы будуць значна горшыя.
Міністр падсумаваў, што гэтая адмова Пуціна ад міру павінна прывесці да істотнага ўзмацнення міжнароднага ціску на Расію і павелічэння падтрымкі Украіны.