The Telegraph: У Пецярбургу Пуцін прадэманстраваў крытычную дэградацыю Крамля
- 7.06.2026, 4:20
Замест сусветных зорак у Расіі цяпер з помпай сустракаюць вельмі сумнеўных асобаў.
Пецярбургскі міжнародны эканамічны форум, які адбыўся на гэтым тыдні, прадэманстраваў ступень дэградацыі, якой падверглася крамлёўская прапаганда за апошнія дзесяцігоддзі. Пра гэта ў аўтарскай калонцы для The Telegraph (пераклад — «УНІАН») піша брытанскі аглядальнік Оўэн Мэцьюз.
Аўтар нагадвае, што ў эпоху СССР Масква ўмела выкарыстоўвала так званых «карысных ідыётаў» — заходніх знакамітасцяў, якія свядома або несвядома дапамагалі Маскве распаўсюджваць сярод сусветнай аўдыторыі станоўчы вобраз Савецкага Саюза. Мэцьюз адзначае, што гэта былі пісьменнікі, мастакі і філосафы сусветнага ўзроўню, у прыватнасці Пабла Пікаса, Джордж Бернард Шоу, Джон Стэйнбек, Андрэ Жыд і Жан-Поль Сартр.
Пры гэтым Крэмль прыкладаў намаганні, каб гэтыя людзі сапраўды верылі ў перавагі савецкай сістэмы і былі шчырымі рупарамі чырвонай прапаганды. Як піша Мэцьюз, для такога кшталту замежных гасцей арганізоўвалі старанна зрэжысіраваныя паездкі па Савецкім Саюзе, пасля якіх заходнія знакамітасці вярталіся дадому заўзятымі прыхільнікамі камунізму.
- Заўтра я пакідаю гэтую зямлю надзеі і вяртаюся ў нашы заходнія краіны — краіны адчаю, — пісаў у дзённіку брытанскі драматург Джордж Бернард Шоу, пакідаючы СССР пасля паездкі ў 1931 годзе.
Аднак сучасная Расія і блізка не здольная дзейнічаць такімі метадамі і не можа знайсці шчырых «карысных ідыётаў» такога ж узроўню аўтарытэтнасці, якія былі б яе рупарамі ў свеце. Замест гэтага сёння ў Расію прыязджаюць надзвычай сумнеўныя персоны, якія не вераць у «рускі свет», а з’яўляюцца толькі «папутчыкамі» Крамля ў сваёй нянавісці да заходняга свету.
У доказ гэтага Мэцьюз прыводзіць спіс галоўных заходніх «зорак» цяперашняга Пецярбургскага форуму: прыхільніца тэорый змовы Кэндэс Оўэнс, аджыўшы сваё пасрэдны акцёр Сцівен Сігал, былы інспектар ААН Скот Рытэр, які адбыў пакаранне ў ЗША за сэксуальныя злачынствы, а таксама інфлюэнсеры-мізагіны Эндру і Трыстан Тэйты, якім у Румыніі і Вялікабрытаніі прад’яўлены абвінавачванні ў злачынствах.
На думку аглядальніка, яшчэ да 2022 года ў Уладзіміра Пуціна было значна шырэйшае кола прыхільнікаў сярод еўрапейскіх палітыкаў, уключаючы такіх цяжкавагавікоў еўрапейскай палітыкі, як экс-прэм’ер Італіі Сільвіа Берлусконі і французская палітык Марын Ле Пен.
Цяпер жа, адзначае аўтар, спробы Крамля прадэманстраваць падтрымку з боку Захаду выглядаюць усё больш жаласна і паказваюць, наколькі дэградавала «мяккая сіла» Расіі, што яна ўжо не можа прыцягнуць нават «паўпрыстойных ідыётаў».
- Сёння Пуцін выглядае самотным і ўсё больш смешным. Спробы Крамля прадэманстраваць, што ў яго ўсё яшчэ ёсць сябры і прыхільнікі на Захадзе, выглядаюць жаласна, няўклюдна і выклікаюць глыбокае збянтэжанне. Гэта сумны паказчык комплексу непаўнавартасці Расіі, што яна ўсё яшчэ імкнецца да прызнання з боку заходніх людзей — нават калі гэта інфлюэнсеры з TikTok, дзівакі на стэроідах, — рэзюмуе аўтар публікацыі.