«Гэта перавышэнне зааблачнай нахабнасці РФ»

• 7.06.2026, 14:11

Зяленскі заклікаў пакараць Расію за ўдар па сховішчы ядзерных адходаў каля ЧАЭС.

Армія Расіі нанесла ўдар дронам-камікадзэ па аб’екце ядзернай энергетыкі паблізу Чарнобыльскай атамнай электрастанцыі. Варожы беспілотнік паразіў адну з будынкаў Цэнтралізаванага сховішча адпрацаванага ядзернага паліва.

Пра гэта заявіў прэзідэнт Украіны Уладзімір Зяленскі. Паводле яго слоў, пацярпелы аб’ект уваходзіць у надзвычай крытычную інфраструктуру. Прэзідэнт асудзіў удар і заклікаў свет пакараць Расію.

Паводле слоў кіраўніка дзяржавы, Міністэрства замежных спраў Украіны і Мінэнерга ўжо інфармуюць аб інцыдэнце краіны-саюзніцы Кіева.

«Расія свядома нанесла ўдар менавіта па гэтым аб’екце ядзернай інфраструктуры. Па стане на цяпер няма перавышэння нормаў радыяцыйнага фону. Але адназначна ёсць перавышэнне нават ужо даўно зааблачнай расійскай нахабнасці. Украінскія выратавальнікі спынілі пажар на гэтым аб’екце пасля ўдару. І патрэбныя рэальныя новыя крокі свету, каб расіяне адчулі, што такая іх тэрарыстычная вайна — удар па самой Расіі», — кажа кіраўнік Украіны.

Акрамя таго, паводле слоў Зяленскага, гэтай ноччу расійская армія атакавала 13 украінскіх рэгіёнаў. Паводле яго звестак, цягам гэтага тыдня Расія запусціла па Украіне 88 ракет, больш за 3250 ударных дронаў і каля 1800 кіраваных авіябомбаў.

Што вядома пра ўдар

Паводле інфармацыі «Энергаатама», удар па будынку, дзе захоўвалася ядзернае паліва, адбыўся 7 чэрвеня а 02:10. З-за траплення дрона на тэрыторыі часткова разбураны будынак прыёму кантэйнераў. Там удакладнілі, што адпрацаванае ядзернае паліва ў гэтым будынку не захоўвалася.

Атакаваны расіянамі будынак знаходзіцца прыблізна ў 15 кіламетрах ад ЧАЭС. Аб’ект прызначаны для доўгатэрміновага бяспечнага захоўвання адпрацаванага ядзернага паліва з рэактараў тыпу ВВЭР украінскіх атамных электрастанцый.