Эксперт ISW: Трамп памыляецца наконт Лукашэнкі

• 7.06.2026, 18:59

Дыктатар дзейнічае разам з РФ.

Магчыма, адміністрацыя прэзідэнта ЗША Дональда Трампа спрабуе ўмацаваць адносіны з Беларуссю ў надзеі, што гэта дапаможа ў перамовах з Расіяй аб спыненні вайны супраць Украіны, — сказаў PAP Джордж Баррос, эксперт Інстытута вывучэння вайны (ISW).

Паводле меркавання эксперта, ЗША «спрабуюць (давесці да — заўв.) свайго роду збліжэнне з Беларуссю або стварыць нефармальны канал сувязі з Мінскам. Гэта тэндэнцыя, якую мы назіралі ўжо ў 2025 годзе, у першы год другога тэрміну адміністрацыі Трампа: розныя прыватныя перамовы, зняцце санкцый з (беларускай авіякампаніі) «Белавія» і г. д.», — пералічыў ён.

«Мне падаецца, што адміністрацыя Трампа зыходзіць з таго, што Беларусь можа быць карыснай у перамовах з Расіяй і ў камунікацыі з расіянамі па пытанні спынення вайны ва Украіне. Шчыра кажучы, я лічу, што гэта памылковая ацэнка сітуацыі, паколькі Расія дэ-факта амаль цалкам падпарадкавала сабе Беларусь», — падкрэсліў Баррос.

На яго думку, «Расію і Беларусь больш не варта разглядаць як цалкам асобныя суб'екты».

«Іх дзеянні ў значнай ступені ўзаемазвязаныя, а дзеянні Беларусі падтрымліваюць расійскую стратэгію», — дадаў ён.