Першыя даныя ЦВК: партыя Пашыняна лідзіруе на выбарах у Арменіі

• 7.06.2026, 23:16

Прарасійскія сілы моцна адстаюць.

Партыя «Грамадзянскі дагавор» дзеючага прэм'ер-міністра Арменіі Нікола Пашыняна лідзіруе на парламенцкіх выбарах, паведамляе ЦВК краіны.

Першыя даныя. Паводле даных з першых 110 участкаў, партыя «Грамадзянскі дагавор» набірае 57,14% галасоў.

Следам ідзе блок «Моцная Арменія» на чале з расійскім мільярдэрам Самвелам Карапецянам — 21,43% галасоў.

На трэцім месцы блок «Арменія», які ўзначальвае былы прэзідэнт Роберт Качарян. Паводле папярэдніх даных яны набіраюць 8,21%.

Партыя «Працвітаючая Арменія» бізнесмена Гагіка Царукяна на гэты момант мае 5,1% галасоў.

Яўка склала 58,97%, усяго прагаласавалі 1 476 597 грамадзян Арменіі — такія даныя абнародаваў ЦВК а 21:00 па мясцовым часе.

У выбарах узялі ўдзел 18 палітычных сіл: 16 партый і два альянсы. Партыя цяперашняга прэм'ер-міністра Нікола Пашыняна ўступіла ў барацьбу з прарасійскімі аб'яднаннямі. Перадвыбарчая кампанія праходзіла на фоне збліжэння Еўрасаюза і Арменіі, а таксама нарастаючай напружанасці паміж Масквой і Ерэванам.