«ЗСУ могуць узяць пад кантроль Крымскі мост»
- 8.06.2026, 15:17
Кіеў уключае для паўвострава «херсонскі сцэнар»?
ЗСУ планамерна адразаюць лагістыку расійскіх акупантаў у Крыме. Пасля ўдару па мосце ў раёне Чонгара быў закрыты пункт пропуску «Джанкой», а сёння на паўвостраве спынілі рух пасажырскіх цягнікоў.
Што цяпер можна сказаць пра расійскую лагістыку ў акупаваны Крым? Наколькі паспяхова ЗСУ адразаюць шляхі забеспячэння акупантаў? Пра гэта сайт Charter97.org пагаварыў з украінскім ваенна-палітычным аглядальнікам групы «Інфармацыйны супраціў» Аляксандрам Каваленкам:
— Цяпер адбываецца працэс вынішчэння лагістыкі расійскай групіроўкі на мацерыковым поўдні Украіны, у Запарожскай і Херсонскай абласцях. Паміж сабой гэтыя вобласці злучаныя сухапутнымі калідорамі М-14, М-17, М-18, М-47, М-57 і іншымі.
Але тут вельмі важна і тое, што Крым адыгрывае ролю лагістычнага хаба, транзітнага вузла ў Херсонскую і Запарожскую вобласці праз Чонгар і Армянск. Адпаведна, калі мы гаворым пра пастаўленую задачу цалкам адрэзаць лагістыку расійскай паўднёвай групіроўкі, а гэта група войскаў «Днепр», частка падраздзяленняў групы войскаў «Цэнтр» і іншыя, то гаворка ідзе ў тым ліку і пра ізаляцыю Крыму як лагістычнага вузла.
Таму выконваецца комплексная задача: на мацерыковай частцы пераразаецца сухапутная лагістыка, а Крым паралельна ізалюецца, каб туды нічога не заязджала і адтуль нічога не выязджала. Гэта сістэмная праца цяпер і вядзецца.
— Крымскі мост застаецца ключавой артэрыяй забеспячэння расійскай групіроўкі. Наколькі верагодная новая аперацыя ЗСУ супраць яго?
— Думаю, што пакуль гаворкі пра нейкую ўдарную аперацыю з нанясеннем удару па Керчанскім мосце няма. Але ці можам мы дыстанцыйна ўзяць яго пад кантроль, як трасу М-14 на поўдні Данецкай і Запарожскай абласцей, у напрамку Марыупаля і Бердзянска? Думаю, так.
Такая магчымасць ёсць, бо дроны, якія мы выкарыстоўваем, напрыклад, для кантролю лагістыкі на мацерыковай частцы Украіны, Hornet, RAV2X, «Булава», маюць далёкасць палёту 150–200 кіламетраў. Здаецца, што Керчанскі мост знаходзіцца далей, але гэта ўжо не з’яўляецца сакрэтам або нейкай вайсковай таямніцай. Частку адлегласці мы можам пераадольваць з дапамогай аэрастата.
Усталёўваючы дрон на аэрастат, мы захоўваем энергарэсурс самага дрона. Фактычна за кошт аэрастата можна пераадольваць больш за 50 кіламетраў. Па сутнасці, аэрастаты нават у пэўнай ступені могуць скідваць дроны літаральна над Керчанскім мостам, і яны ўжо пачынаюць патруляванне гэтай дарогі, як чыгуначнага ўчастка, так і аўтамабільнага.
Будзе аналагічная сітуацыя, як і з трасай М-14 на ўчастку Марыупаль — Бердзянск. Розніца толькі ў тым, што на трасе Марыупаль — Бердзянск у кіроўцы ёсць хаця б нейкі манеўр налева-направа, а вось на Керчанскім мосце манеўру няма. Скочыш або ў Азоўскае мора, або ў Чорнае. Таму гэта значна ўскладняе манеўраванне для праціўніка і, наадварот, палягчае ЗСУ нанясенне ўдараў па мэце.
Таму я думаю, што, хутчэй, гэта будзе менавіта кантроль Керчанскага моста такога характару. Не ракетны або дронавы ўдар, а кантроль з паветра.
— Ці можа поўнае спыненне лагістыкі ў Крым, а таксама ў Запарожскую і Херсонскую вобласці прывесці да сітуацыі 2022 года на правабярэжжы Херсоншчыны, калі расійскія акупанты былі вымушаныя ўцякаць, кідаючы пазіцыі?
— Пакуль рана пра гэта казаць, але ў прынцыпе гэта рэальна. Прычым гэта можа пачацца не столькі з Запарожскай вобласці, колькі, хутчэй за ўсё, з Херсонскай. Яна больш уразлівая ў пытанні забеспячэння.
Запарожская вобласць таксама ўразлівая, але там, на жаль, ёсць агульная адміністрацыйная мяжа з Данецкай вобласцю, і там рокады ўсё ж такі працуюць. Так, мы іх кантралюем, так, мы туды лятаем, але гэтыя рокады ідуць у бок Расійскай Федэрацыі, і ёсць прыток грузаў як мінімум праз Данецкую вобласць. Грузапаток ёсць.
А Херсонская вобласць цалкам ізаляваная. Яна ўпіраецца або ў Чорнае мора, або ў Крым, Армянск. Праз Армянск ідзе дарога, якую таксама можна знішчыць і адрэзаць. Альбо яна ўпіраецца ў Запарожскую вобласць.
Пры гэтым значная частка заходняй адміністрацыйнай мяжы Запарожскай вобласці — гэта ўжо лагістычны лакдаўн, усходняя больш-менш працуе. Таму Херсоншчына больш уразлівая.
Такі сцэнар цалкам магчымы, я яго абсалютна не выключаю. Але, зноў-такі, пра гэта пакуль рана казаць. Павінны быць створаныя адпаведныя ўмовы. А ўмовы — гэта маштабаванне лагістычнага лакдаўну на кожным з сектараў.