Першы «расійскі Starlink» сышоў з арбіты і згарэў у атмасферы

• 8.06.2026, 19:21

Што вядома.

Адзін з расійскіх спадарожнікаў «Рассвет», які ў РФ называюць аналагам Starlink мільярдэра Ілона Маска, меркавана, сышоў з арбіты 6 чэрвеня. Пра гэта паведаміў англамоўны спецыялізаваны рэсурс пра расійскую касмічную праграму RussianSpaceWeb.

Запуск першай партыі спадарожнікаў адбыўся 23 сакавіка з касмадрома Плесецк (1-ы Дзяржаўны выпрабавальны касмадром), што ў Архангельскай вобласці Расіі. Усяго на арбіту вывелі 16 апаратаў, якія павінны стаць часткай расійскай нізкаарбітальнай інтэрнэт-сеткі, піша RussianSpaceWeb. Распрацоўшчыкам праекта з'яўляецца маскоўская кампанія «Бюро 1440».

Паводле звестак рэсурсу, пасля запуску спадарожнікі мусілі падняцца на больш стабільную арбіту. Пазней частка апаратаў пачала манеўраваць і паступова набіраць вышыню, але адзін з іх — аб'ект 4 — працягваў зніжацца без прыкмет працы рухавікоў.

Менавіта гэты спадарожнік, верагодна, першым увайшоў у атмасферу і згарэў. На дадзены момант афіцыйнай інфармацыі пра стан місіі не было.