Польшча згарнула праект спрошчанага працаўладкавання замежнікаў

• 9.06.2026, 4:00

Падрабязнасці.

Урад Польшчы нечакана заблакаваў ключавыя змены, якія мелі на мэце спрасціць кампаніям найм замежнікаў і змагацца з недахопам персаналу. Пра гэта піша Dziennik Gazeta Prawna.

Апошнія некалькі месяцаў працадаўцы разлічвалі на ўвядзенне спісу дэфіцытных прафесій, які дазволіў бы значна паскорыць афармленне дазволаў на працу для замежных грамадзян. Аднак улады вырашылі замарозіць гэты праект.

Праект аб «дэфіцытных прафесіях» яшчэ 15 студзеня быў накіраваны на грамадскія кансультацыі. Працадаўцы чакалі, што новыя правілы неўзабаве ўступяць у сілу і дапамогуць вырашыць праблему працяглых працэдур у ваяводскіх упраўленнях, дзе ўтварыліся вялікія чэргі пры легалізацыі знаходжання замежнікаў.

Прадбачвалася, што кампаніі, якія наймаюць супрацоўнікаў па прафесіях з гэтага спісу, будуць вызваленыя ад неабходнасці атрымліваць заключэнне старасты аб немагчымасці знайсці работніка на мясцовым рынку працы. Менавіта гэтая працэдура лічыцца адной з самых працяглых пры афармленні замежнікаў.

Да так званай паскоранай працэдуры атрымання дазволаў на працу для замежнікаў унеслі больш за 300 прафесій. Прыярытэт планавалі надаваць сектарам аховы здароўя і догляду, транспарту і лагістыкі, будаўніцтву і прамысловасці, а таксама рэдкім прафесіям, такім як бурыльшчыкі, зваршчыкі і інш.

Аднак высветлілася, што запланаваныя змены не будуць рэалізаваныя. Міністэрства па справах сям’і, працы і сацыяльнай палітыкі пацвердзіла, што праца над рэгламентам прыпыненая і цяпер ніякіх далейшых крокаў не прадугледжваецца. Міністэрства адзначыла, што рашэнне звязана з ростам беспрацоўя.

Працадаўцы не хаваюць здзіўлення: хоць паказчык беспрацоўя сапраўды аказаўся вышэйшым, чым год таму, негатыўная тэндэнцыя ўжо пачала змяняцца, і сітуацыя паступова паляпшаецца.

Прадпрымальнікі адзначаюць, што ва многіх галінах праблема заключаецца не ў недахопе ахвотных працаваць, а хутчэй у дэфіцыце людзей з адпаведнай кваліфікацыяй або гатовых уладкавацца на працу па пэўных спецыяльнасцях. Таму спіс дэфіцытных прафесій быў задуманы як адзін з інструментаў, якія дапамагаюць ім хутчэй рэагаваць на патрэбы рынку.