Чацвёртая запар параза Крамля

• Вадзім Дзянісенка
• 9.06.2026, 9:02

Формула «за Расію — значыць лузер» можа стаць усеахопнай.

55% за партыю Пашыняна — гэта разгром. Але прарасійскія партыі набіраюць 35–36%. Таму Расія паспрабуе працягнуць актыўна дзейнічаць.

Гэта чацвёртая запар параза расійскай прапагандысцкай машыны (да гэтага былі Румынія, Малдова і Венгрыя). І гэта трэцяя параза каманды першага намесніка кіраўніка Адміністрацыі прэзідэнта РФ Сяргея Кірыенкі на замежных выбарах. З улікам такога выніку пазіцыі Кірыенкі не могуць не аслабнуць. У цэлым ягоныя пазіцыі ў многім будуць залежаць ад таго, як яму ўдасца правесці восеньскую выбарчую кампанію ў Дзярждуму і спыніць перацяканне лаялістаў у стан апазіцыі. Тым не менш, незадаволеных дзеяннямі Кірыенкі занадта шмат, і кулуарныя войны супраць яго толькі пачынаюцца.

Калі паглядзець крыху шырэй, гэтыя паразы паказваюць, што быць прарасійскім у палітыцы становіцца нявыгадна. Мы бачым дрэйф Фіцо пасля паразы Орбана. Але гэта — толькі пачатак. У многіх прарасійскіх палітыкаў пачынае з'яўляцца страх, што формула «за Расію — значыць лузер» можа стаць усеахопнай.

Перамога Пашыняна ўсё яшчэ не азначае поўнага разрыву з Масквой, як гэта можа шмат каму падацца. Падаецца, Пашынян паспрабуе яшчэ раз дамовіцца, асабліва ўлічваючы танны газ. Тут варта адзначыць: на яго ніхто не цісне, каб ён разарваў адносіны з Расіяй. Таму, калі расіяне не будуць поўнымі ідыётамі, яны змогуць захаваць цяперашні статус-кво. Калі не, пачнецца вельмі складаны працэс выціскання Расіі не толькі з Арменіі, але і з Каўказа ў цэлым.

Вадзім Дзянісенка, «Фэйсбук»