Польшча рэзка скараціла выдачу рабочых віз і дазволаў на працу

• 9.06.2026, 20:17

МУС Польшчы падзялілася дадзенымі.

За чатыры гады Польшча ў 7,7 раза скараціла выдачу рабочых віз, сведчаць дадзеныя Міністэрства ўнутраных спраў і адміністрацыі. У I квартале 2022 года Польшча выдала 123 тыс. рабочых віз, тады як за той жа перыяд 2026 года — толькі 16 тыс., адзначае Most.

Колькасць выдадзеных дазволаў на працу скарацілася за гэты перыяд са 122 тыс. да 38 тыс.

«Цяпер дакументы атрымліваюць выключна тыя замежнікі, чыя прысутнасць прыносіць рэальную карысць польскай эканоміцы і не ўяўляе пагрозы для бяспекі дзяржавы», — гаворыцца ў паведамленні МУС.

Звяртаем увагу, што пасля пачатку вайны ва Украіне ўкраінскія бежанцы фактычна атрымалі свабодны доступ да польскага рынку працы, што знізіла патрэбу ў дазвольных дакументах.

Таксама за апошнія гады зменшылася колькасць выдаваных студэнцкіх віз. У 2021 годзе Польшча выдала амаль 31 тыс. такіх віз, а ў 2025 годзе — усяго 11 тыс. Пры гэтым у МУС удакладнілі, што змагаюцца са злоўжываннямі, калі замежнікі атрымлівалі візы для ўезду ў Шэнгенскую прастору без рэальнага намеру вучыцца. Узмацненне кантролю, на думку міністэрства, прынесла плён.

«Польшча падтрымлівае рэальную інтэрнацыяналізацыю навукі праз выдачу студэнцкіх віз у адпаведнасці з іх прызначэннем», — гаворыцца ў прэс-рэлізе МУС.