У Гомелі вадалазы знайшлі на дне Сожа рэшткі маманта і бізона

• 10.07.2026, 5:53

Фотафакт.

Падчас трэніровачных апусканняў вадалазы Заходняй станцыі АСВОД паднялі са дна ракі Сож рэшткі старажытных жывёл, паведамляе belkagomel.by.

Апусканні адбываліся за 300 метраў ніжэй па цячэнні ад пляжа Шведская горка. Вадалаз на глыбіні 10–12 метраў убачыў вялізарную косць. Абследаваўшы дно ў радыусе 30 метраў ад гэтага месца, ён дастаў яшчэ пяць фрагментаў шкілета.

Пра новыя знаходкі паведамілі спецыялістам музея Гомельскага палацава-паркавага ансамбля. Паводле папярэдняй ацэнкі, пяць знойдзеных костак належаць маманту, адна — старажытнаму бізону.

Дакладны ўзрост рэшткаў яшчэ трэба ўстанавіць. Без спецыяльных даследаванняў зрабіць гэта немагчыма, аднак, папярэдне, косткам каля 20 тысяч гадоў.