Reuters: Вытворчасць бензіну ў РФ пакрывае толькі 65% попыту

• 10.07.2026, 17:25

Дэфіцыт вытворчасці бензіну ў Расіі складае 40 000–45 000 тон за суткі.

На дадзены момант вытворчасць бензіну ў Расіі пакрывае толькі 65% сезоннага сутачнага спажывання пасля ўкраінскіх удараў па яе нафтаперапрацоўчай інфраструктуры. Пра гэта паведаміла Reuters са спасылкай на галінавыя крыніцы і ўласныя разлікі.

Суразмоўцы заявілі, што сутачны попыт на бензін у Расіі ў перыяд пікавага летняга спажывання складае каля 115 000–120 000 тон, а вытворчасць не пакрывае яго на 40 000–45 000 тон за суткі (каля 35%). У чэрвені штодзённы дэфіцыт складаў 25%.

Крыніцы таксама паведамілі агенцтву, што чакаюць паляпшэння сітуацыі на рынку паліва ў РФ у другой палове ліпеня пры ўмове адсутнасці новых удараў па НПЗ.

1 ліпеня стала вядома, што РФ пачала імпартаваць бензін з Індыі. Акрамя таго, Казахстан пагадзіўся перадаць Расіі 50 000 тон бензіну ў ліпені і жніўні ў якасці гуманітарнай дапамогі.

9 ліпеня ўлады Расіі афіцыйна заявілі, што будуць імпартаваць нафтапрадукты, а таксама цалкам забаранілі экспарт дызельнага паліва. Раней урад РФ забараніў экспарт аўтамабільнага бензіну і авіякерасіну.