Што вядома пра новага прэм’ер-міністра Украіны Сяргея Карэцкага

• 17.07.2026, 11:25

Ён стаў трэцім кіраўніком урада з пачатку поўнамаштабнай вайны.

Вярхоўная Рада зацвердзіла Сяргея Карэцкага новым прэм’ер-міністрам Украіны. Ён стаў трэцім кіраўніком урада з пачатку поўнамаштабнай вайны і ўзначаліў Кабінет міністраў у межах маштабных кадравых перастановак, абвешчаных прэзідэнтам Украіны Уладзімірам Зяленскім, — піша агенцтва Reuters (пераклад — сайт Charter97.org).

48-гадовы Карэцкі — інжынер і эканаміст паводле адукацыі. Да прызначэння ён не займаў дзяржаўных пасад і не складаўся ні ў якой палітычнай партыі. На думку аналітыкаў, менавіта гэта можа стаць яго моцным бокам. Дырэктар цэнтра «Пента» Уладзімір Фесенка лічыць, што спалучэнне рэпутацыі «добрага мэнэджара» і палітычнай нейтральнасці дае новаму прэм’еру перавагу.

Карэцкі больш за 20 гадоў працуе ў энергетычнай галіне. З мая 2025 года ён узначальваў дзяржаўную кампанію «Нафтогаз Украіны», якая адказвае за значную частку здабычы, імпарту і паставак газу ў краіне. Раней кіраваў найбуйнейшай нафтавай кампаніяй «Укрнафта», а да пераходу ў дзяржаўны сектар займаў кіраўнічыя пасады ў групе Continuum, сетцы аўтазаправачных станцый WOG і заснаваў уласную сетку кавярняў.

«Адна з першых задач новага прэм’ер-міністра — падрыхтоўка краіны да надыходзячай зімы. Пасля маштабных удараў па энергетычнай інфраструктуры ў мінулы ацяпляльны сезон украінскія ўлады імкнуцца ўмацаваць энергасістэму на фоне новых расійскіх атак і дэфіцыту сродкаў супрацьракетнай абароны», — піша агенцтва.

Зяленскі ўжо падкрэсліў, што «падрыхтоўка да зімы з’яўляецца прыярытэтам», і менавіта гэтаму кірунку новы ўрад надасць першачарговую ўвагу.