Саудаўскі фонд набывае гульнявога гіганта Electronic Arts

• 19.07.2026, 3:45

Кошт рэкорднай здзелкі складзе 55 мільярдаў долараў.

Кансорцыум інвестараў на чале з суверэнным фондам Саудаўскай Аравіі можа ў найбліжэйшы час атрымаць адабрэнне ад Еўрапейскага саюза на набыццё гіганта гульнявой індустрыі Electronic Arts за 55 мільярдаў долараў. Калі здзелка будзе завершаная, яна стане найбуйнейшым у гісторыі выкупам кампаніі з выкарыстаннем пазыковых сродкаў.

Паводле звестак Reuters, Еўрапейская камісія мае намер ухваліць здзелку без дадатковых умоў у межах антыманапольнай праверкі. Папярэдняе рашэнне чакаецца 22 ліпеня, а афіцыйнае павінны вынесці да 30 ліпеня 2026 года.

Здзелка па набыцці Electronic Arts цягнецца яшчэ з верасня 2025 года, калі кансорцыум абвясціў пра намер набыць уладальніка брэндаў EA Sports FC, The Sims, Battlefield і Need for Speed. Выдавец уваходзіць у тройку найбуйнейшых гульцоў індустрыі разам з Activision Blizzard і Take-Two. У снежні 2025-га акцыянеры EA ўхвалілі продаж за $55 млрд.

Для Саудаўскай Аравіі набыццё аднаго з найбуйнейшых у свеце гульнявых выдаўцоў з'яўляецца важным крокам у рэалізацыі стратэгіі дыверсіфікацыі эканомікі. Каралеўства актыўна інвестуе ў гульнявыя студыі, кіберспорт і турыстычную галіну, імкнучыся зменшыць залежнасць ад нафтавых даходаў.

Для самой EA такая здзелка можа азначаць больш гнуткі падыход да распрацоўкі гульняў, як лічаць эксперты. Без ціску з боку інвестараў і неабходнасці штоквартальна даваць справаздачу аб фінансавых паказчыках студыі змогуць засяродзіцца на паляпшэнні якасці і развіцці сваіх гульняў.