У Шклоўскім раёне патануў 11-гадовы хлопчык

• 19.07.2026, 5:14

Хлопчык паслізнуўся на адкосе і ўпаў у вадаём.

Усё здарылася ўдзень 18 ліпеня ў вёсцы Троіца Шклоўскага раёна. 11-гадовы хлопчык разам з сябрам катаўся на веласіпедах. Потым яны накіраваліся да дамбы.

Адзін з хлопчыкаў пачаў спускацца па адкосе да вады, паслізнуўся і ўпаў у вадаём, паведамляе Следчы камітэт.

Хлопчык не выплыў, яго цела падчас пошукавых мерапрыемстваў знайшлі выратавальнікі. Нягледзячы на намаганні ўрачоў, выратаваць хлопчыка не ўдалося.

— Цяпер на месцы здарэння працуе следча-аператыўная група. Следчым з прыцягненнем спецыялістаў УДКСЭ па Магілёўскай вобласці праводзіцца агляд, апытваюцца сваякі і відавочцы, — паведамляе Следчы камітэт і дадае, што па гэтым факце праводзіцца праверка.