«Мамай» паразіў расійскі танкер

• 19.07.2026, 12:48

Паспяховая атака каля Наварасійска.

Бязэкіпажны катэр (БЭК) СБУ паспяхова паразіў карабель Avero, які з'яўляецца часткай «ценявога флоту» РФ. Момант атакі быў зняты на відэа. Ролік раніцай 19 ліпеня быў апублікаваны ў афіцыйным X-акаўнце спецслужбы.

Атака была ажыццёўлена недалёка ад порта Наварасійска ў Чорным моры.

«Avero быў задзейнічаны ў транспартаванні расійскай сырой нафты… Судна вывозіла нафту, у прыватнасці, у Кітай і Індыю… Менавіта такія судны «ценявога флоту» дапамагаюць Крамлю абыходзіць санкцыі, забяспечваць экспарт нафты і атрымліваць сродкі для фінансавання вайны», — адзначылі ў СБУ.

Яны ўдакладнілі, што аперацыя была ажыццёўлена з дапамогай марскога дрона «Мамай». Гэта БЭК, які здольны разганяцца да 110 км/г, нясе баявую частку вагой 450 кг і мае кулянепрабіўны корпус.

Судзячы па апублікаваным відэа, «Мамай» бесперашкодна наблізіўся да расійскага карабля, атакаваўшы яго ў кармавую частку. Наступствы ўдару ўдакладняюцца, але, улічваючы магутнасць БЭКа, яны значныя.

У СБУ адзначылі, што гэта ўжо чацвёрты карабель «ценявога флоту» РФ, паражаны воінамі службы за апошнія 10 дзён.