Крэмль за 10 гадоў скараціў насельніцтва Данбаса амаль на 30%

• 21.07.2026, 4:46

Улады РФ таксама масава перавозяць туды расіян.

Насельніцтва Данбаса з-за дзеянняў расійскіх акупантаў скарацілася амаль на траціну: калі ў 2001 годзе ў Данецкай і Луганскай абласцях пражывала каля 7,37 млн чалавек, то на пачатак 2024 года засталося прыкладна 3,75 млн.

Пра гэта 20 ліпеня паведамілі ў Галоўным упраўленні разведкі Мінабароны Украіны.

У ГУР тлумачаць такую дэмаграфічную сітуацыю вайной, рэпрэсіямі, прымусовай русіфікацыяй, мабілізацыяй у войска, пагаршэннем якасці медыцынскіх і сацыяльных паслуг, а таксама адсутнасцю абароны права ўласнасці, з-за чаго украінцы працягваюць выязджаць з часова акупаваных раёнаў Данбаса.

У той жа час Крэмль актыўна завозіць на захопленыя тэрыторыі грамадзян Расіі. Па стане на ліпень 2026 года ў часова акупаваных Крыме і Севастопалі знаходзяцца 200–300 тысяч этнічных рускіх. Пры гэтым да 2042 года ўлады краіны-агрэсара плануюць перасяліць яшчэ 130 тысяч расіян толькі ў Севастопаль, паведамілі ўкраінскія афіцэры.

Паводле даных ГУР, па стане на 2024 год на акупаваных тэрыторыях Данецкай, Луганскай, Запарожскай і Херсонскай абласцей знаходзіліся 200 тысяч этнічных рускіх і яшчэ каля 100 тысяч працоўных мігрантаў з Цэнтральнай Азіі і з Каўказа — толькі з пачатку 2026 года на акупаванай частцы Данецкай вобласці было зарэгістравана яшчэ каля 10 тысяч такіх мігрантаў.

Чыноўнікам, накіраваным у камандзіроўку на акупаваныя тэрыторыі, выплачваюць падвоены аклад, а таксама прадастаўляюць грашовую кампенсацыю за арэнду жылля. У суме яны могуць атрымліваць больш за 5 тысяч долараў у месяц, што больш чым у восем разоў перавышае сярэдні ўзровень заробку ў Расіі, паведамілі ўкраінскія афіцэры.

Акупацыйныя праграмы «земскі доктар», «земскі настаўнік» і падобныя абавязваюць расіян адпрацаваць у часова падняволеных украінскіх рэгіёнах не менш за 5 гадоў, заявілі ў ГУР.

Акрамя таго, грамадзянам краіны-агрэсара перадаюць адабранае ў украінцаў жыллё і зямельныя ўчасткі — у 2025 годзе ў часова акупаваным Крыме вайсковым-захопнікам раздалі чатыры тысячы зямельных участкаў, паведамілі ўкраінскія афіцэры.

Акрамя таго, Крэмль плануе да 2035 года павялічыць колькасць насельніцтва Марыупальскага і Кальміўскага раёнаў з 228 тысяч да 518 тысяч чалавек, у прыватнасці за кошт перасялення грамадзян Расіі, рэзюмавалі ў ГУР.