У БДУ адбылося залічэнне на бюджэт

• 21.07.2026, 10:16

Дзе найвышэйшыя прахадныя балы?

У панядзелак, 20 ліпеня, у БДУ адбылося залічэнне абітурыентаў на шэраг бюджэтных спецыяльнасцяў дзённай формы навучання. Сярод іх — факультэты міжнародных адносін, юрыдычны, эканамічны, геаграфіі і геаінфарматыкі, а таксама Інстытут тэалогіі імя св. Мяфодзія і Кірыла.

У гэты ж дзень з дапамогай аўтаматызаванай сістэмы ўніверсітэт прыняў бюджэтнікаў па профілях «Фізічныя навукі» і «Матэматычныя навукі і інфарматыка».

Найвышэйшымі аказаліся прахадныя балы на спецыяльнасцях «Міжнародная канфлікталогія» факультэта міжнародных адносін і «Міжнародная эканоміка і гандаль (з паглыбленым вывучэннем кітайскай мовы)» эканамічнага факультэта — па 395 балаў.

Самай шматлікай стала група спецыяльнасцяў профілю «Матэматычныя навукі і інфарматыка», куды залічаныя 454 чалавекі, следам — профіль «Фізічныя навукі» (395 чалавек). Сярод факультэтаў найбольш бюджэтнікаў прыняў юрыдычны факультэт — 233 чалавекі, найменш — Інстытут тэалогіі, дзе студэнтамі сталі 25 абітурыентаў.