«Што цяпер людзям рабіць?»
- 21.07.2026, 11:44
Жыхары Гомельскай вобласці б'юць трывогу.
Жыхарка Брагіна падзялілася сваім болем і падняла праблему перыферыі Гомельшчыны. Медык Юлія Палявая распавяла ў сацыяльнай сетцы, што жыве ў Брагіне, а працуе фельчаркай ФАПу ў 23 кіламетрах ад месца жыхарства — у вёсцы Дзімамеркі Лоеўскага раёна.
Ужо пяць гадоў да месца працы яна дабіраецца аўтобусам па маршруце «Брагін — Гомель (праз Лоеў)» аўтапарка № 6, піша «Флагшток».
Але 20 ліпеня Юлія, прыйшоўшы на аўтастанцыю і набываючы білет, даведалася, што гэты рэйс закрываюць. Прычынай назвалі тое, што на гэтым рэйсе ездзіць мала людзей. Фельчарка патлумачыла:
«Праз вёску, дзе я працую, гэта адзіны рэйс, які за дзень праходзіць туды і назад да Гомеля, так людзі могуць хоць кудысьці паехаць: у Лоеў, Гомель, Рэчыцу. А па дарозе да Лоева ёсць яшчэ вёскі і людзі, якія ездзяць на працу ў Лоеў і не толькі».
Афіцыйнага пацвярджэння адмены рэйса пакуль няма — як і планаванай даты спынення руху па гэтым маршруце. На сайтах аператараў продажу білетаў гэты рэйс пакуль таксама ёсць у раскладзе.
Але медык напісала, што ў аўтапарку пацвердзілі закрыццё рэйса з-за малалікасці пасажыраў:
«Прабачце, але толькі з адной маёй вёскі раніцай штодня ездзяць па пяць чалавек. І што цяпер людзям рабіць? Як дабірацца да працы, пешшу хадзіць? Мая праца мне падабаецца, і я зусім не хачу адтуль сыходзіць, а жыць там няма дзе, ды і ў Брагіне ў мяне сям'я».
Дзяўчына папрасіла парады: куды звярнуцца, каб рэйс пакінулі.
Пост выклікаў рэакцыю аўдыторыі. Фельчарцы параілі падключаць да вырашэння пытання кіраўніцтва бальніцы, раёна, пісаць электронныя звароты, збіраць подпісы, запісваць TikTok.
Некаторыя адзначылі:
«Дык у вас рэйс штодня — яшчэ, лічыце, пашанцавала. Па многіх напрамках «дааптымізаваліся» да таго, што аўтобус ходзіць, напрыклад, два дні на тыдзень — аўторак і чацвер».
Таксама ў каментарыях прывялі прыклад вырашэння падобнай праблемы:
«У нас у вёсцы ёсць аптэка, і неяк «Фармацыя» пусціла чутку, што ўтрымліваць аптэку ў населеным пункце на 1500 чалавек нерэнтабельна. Жыхары пачалі звяртацца ва ўсе арганізацыі, райвыканкам, «Фармацыю» і мясцовыя СМІ. У выніку аптэку пакінулі».
Адзін з карыстальнікаў падкрэсліў: «Няма транспартнай даступнасці — знікнуць вёскі!»
Праблема сапраўды актуальная. СМІ не раз расказвалі пра тэндэнцыю вымірання вёсак на Гомельшчыне: закрыццё школ і дзіцячых садкоў, ліквідацыю сельсаветаў.