Лукашэнка: Сілавікі крышуюць крадзяжы паліва

• 21.07.2026, 16:28

Дыктатар заявіў пра вяртанне ў «ліхія 90-я».

Некаторыя сілавікі не толькі не змагаюцца з крадзяжамі гаруча-змазачных матэрыялаў, але і самі пакрываюць расхіцельнікаў, а часам «уваходзяць з імі ў долю». Такую заяву зрабіў Аляксандр Лукашэнка на селектарнай нарадзе па пытаннях уборачнай кампаніі 21 ліпеня.

Па яго словах, з пачатку ўборачнай МУС ужо выявіла 46 злачынстваў.

«Толькі пачалі ўборку, а МУС ужо выявіла 46 злачынстваў. Асноўныя — гэта крадзеж камплектуючых і запасных частак, хабарніцтва. На першым месцы — крадзеж гаруча-змазачных матэрыялаў», — перадала БЕЛТА словы Лукашэнкі.

Ён назваў крадзеж паліва на сяле «застарэлай праблемай» і раскрытыкаваў мясцовыя ўлады за неэфектыўную барацьбу з ёй.

«У мяне на стале вынікі свежага маніторынгу, які паказаў, што мясцовая ўлада да выкаранення крадзяжоў падыходзіць абы-як, абсалютна фармальна. Таму нячыстыя на руку работнікі крадуць паліва і цалкам упэўненыя ў сваёй беспакаранасці», — заявіў палітык.

Асобна Лукашэнка адзначыў датычнасць да схем саміх сілавікоў.

«Асабліва абурае, што некаторыя супрацоўнікі праваахоўных органаў замест таго, каб змагацца з гэтымі несунамі, уступаюць з імі ў долю і «крышуюць», як у ліхія 90-я. Мужыкі, вы ж разумееце, што 90-х нават у гэтай дробязнай праблеме мы не дапусцім», — падкрэсліў ён.

Адзначым, што самае МУС тым часам працягвае рэгулярна адчытвацца аб выяўляемых падчас уборачнай кампаніі крадзяжах.