Новая атака дронаў на склады Wildberries: кампанія паведаміла аб наступствах

• 22.07.2026, 11:56

На месцах была праведзена эвакуацыя супрацоўнікаў.

Уначы на 22 ліпеня былі атакаваныя лагістычныя цэнтры маркетплэйса Wildberries у Краснадары (Краснадарскі край) і ў Невіннамыску (Стаўрапольскі край РФ). Па папярэдніх даных кампаніі, у выніку атакі ёсць пацярпелыя.

Аб гэтым паведаміла заснавальніца Wildberries і кіраўніца кампаніі «РВБ» Таццяна Кім.

Паводле яе слоў, кампанія сумесна з профільнымі службамі ліквідуе наступствы атакі, а на месцах была праведзена эвакуацыя супрацоўнікаў.

«Паводле папярэдніх даных, на жаль, ёсць пацярпелыя. Мы абавязкова акажам усю неабходную дапамогу», — паведаміла Кім.

Wildberries — найбуйнейшы расійскі маркетплэйс, а яго лагістычныя цэнтры выкарыстоўваюцца для прыёму, захоўвання, сартавання і дастаўкі тавараў прадаўцоў.

Раней Кім паведаміла, што пасля завяршэння ацэнкі стану лагістычнага комплексу ў Котаўску (Тамбоўская вобласць РФ) 23 ліпеня склад зноў пачне прымаць пастаўкі, а тавары, што знаходзіліся на ім, вярнуцца ў продаж.

Акрамя таго, у найбліжэйшы час кампанія плануе абнавіць справаздачы на партале прадаўцоў, каб карэктна адлюстраваць тавары, якія знаходзіліся на складзе ў Электрасталі (Маскоўская вобласць РФ). Таксама ў Wildberries заявілі, што пасля ацэнкі наступстваў паведамяць пра парадак кампенсацыі за пашкоджаныя тавары.