Жыхарам Краснадара параілі не выходзіць на вуліцу і насіць рэспіратары пасля ўдару па складзе Wildberries

• 22.07.2026, 14:55

У расійскім горадзе ўвялі яшчэ шэраг абмежаванняў.

Жыхароў Краснадара заклікалі не выходзіць на вуліцу без неабходнасці і насіць рэспіратары з-за пажару на складзе Wildberries, які ўспыхнуў пасля атакі ўкраінскіх беспілотнікаў. З такім зваротам выступіла рэгіянальнае ўпраўленне Роспотребнадзора. Ведамства таксама рэкамендавала не адчыняць вокны, часцей праводзіць вільготнае прыбіранне ў памяшканнях, прамываць вочы, нос і горла, больш піць і адмовіцца ад курэння і нашэння кантактных лінзаў. Пры з'яўленні сімптомаў вострага захворвання, абвастрэння хранічных хвароб, з'яўленні дыхавіцы, кашлю і бяссоніцы гараджанам параілі неадкладна звярнуцца да лекара.

У ноч на 22 ліпеня украінскія дроны атакавалі два буйныя лагістычныя цэнтры Wildberries у Краснадары і Невіннамыску. Аператыўны штаб Краснадарскага краю спачатку апублікаваў відэа палаючага складу, над якім узнімаюцца клубы дыму, удакладніўшы, што ў тушэнні пажару задзейнічана больш за сто чалавек і плануецца прыцягнуць верталёт. Аднак потым публікацыю выдалілі, звярнулі ўвагу «Осторожно, новости». Да гэтага ўкраінскія беспілотнікі атакавалі лагістычныя цэнтры Wildberries у падмаскоўнай Электрасталі і Катаўску ў Тамбоўскай вобласці. Загінулі восем чалавек, каля 80 пацярпелі. У выніку ўдараў таксама ўзніклі моцныя пажары.

Прэзідэнт Украіны Уладзімір Зяленскі пацвердзіў атакі Узброеных сіл Украіны на аб'екты расійскага маркетплэйса, назваўшы іх «дальнабойнымі санкцыямі». Ён таксама заявіў, што лагістычныя цэнтры былі задзейнічаныя «ў забеспячэнні расійскай арміі камплектуючымі для дронаў, навігацыйным абсталяваннем і рыштункам». У канцы чэрвеня ўкраінскі прэзідэнт зацвердзіў для Службы бяспекі Украіны «40-дзённую аперацыю ўплыву» на Расію «з мэтай дамагчыся спынення вайны». Што пад гэтым маецца на ўвазе, ён не ўдакладніў, але згадаў «план дальнабойных санкцый».