Крутой: Ваенныя зборы для неруплівых аграрыяў будуць доўжыцца 2–3 месяцы

• 22.07.2026, 19:17

Раней Лукашэнка загадаў накіраваць аграрыяў на мяжу з Украінай.

На праведзенай у Асіповічах нарадзе з удзелам прадстаўнікоў Асіповіцкага, Глускага і Бабруйскага раёнаў кіраўнік адміністрацыі Лукашэнкі Дзмітрый Крутой абмеркаваў пытанні, паднятыя падчас учорашняй селектарнай нарады па ўборачнай кампаніі з удзелам самога Лукашэнкі.

Дзмітрый Крутой адзначыў, што Лукашэнка ўвёў найбольш жорсткі, мабілізацыйны рэжым правядзення ўборачнай. Галоўная задача цяпер — без страт сабраць ураджай, вырашчаны беларускімі аграрыямі.

У сувязі з гэтым будзе ўзмоцнены кантроль за дысцыплінай. Паводле слоў Крутога, па даручэнні Лукашэнкі Міністэрства абароны павінна падрыхтаваць месцы і віды прац для тых работнікаў, якія парушаюць дысцыпліну.

У кожным раёне старшыня райвыканкама разам з ваенным камісарам і кіраўнікамі сельгаспрадпрыемстваў павінны вызначыць спісы такіх людзей. Сярод іх, як заявіў Крутой, будуць «недабрасумленныя работнікі, парушальнікі, тыя, хто крадзе, злоўжывае спіртным, лянуецца».

Гэтых людзей плануюць накіроўваць у распараджэнне Міністэрства абароны ў межах ваенна-выхаваўчых збораў працягласцю да двух-трох месяцаў. Паводле слоў Крутога, гэта будзе датычыць усіх незалежна ад пасады: калі чалавек сарваў працу — ён будзе накіраваны на зборы.

«Дзякуючы прэсе краіна павінна ведаць не толькі герояў жніва, што абсалютна справядліва, але і такіх «герояў», якія сваім разгільдзяйствам зрываюць працэс. Калі яны праваліліся ў межах уборачнай кампаніі, то, напэўна, у арміі змогуць прынесці карысць краіне — працы там дастаткова, у тым ліку гаспадарчай і бытавой», — заявіў чыноўнік.

Ён падкрэсліў, што такія меры патрэбныя не толькі для пакарання, але і для выхавання. Умовы, паводле яго слоў, будуць «спартанскія», аднак людзі атрымаюць магчымасць умацаваць фізічную форму і прынесці карысць праз працу.

Адказнымі за арганізацыю гэтай работы будуць старшыні райвыканкамаў, ваенкаматы і кіраўнікі сельгаспрадпрыемстваў. Крутой заявіў, што нікога нельга будзе прыкрываць.

«За арганізацыю жніва ў вобласці адказвае старшыня аблвыканкама, а старшыня райвыканкама — цэнтральнае звяно на месцы. Калі не спрацуе раён — адказваць давядзецца яму», — сказаў кіраўнік адміністрацыі Лукашэнкі.