У Сенат ЗША ўнеслі законапраект аб падтрымцы Украіны

• 22.07.2026, 23:17

Гэта найбуйнейшы пакет за час прэзідэнцтва Трампа.

Сенат ЗША ўнёс законапраект «Акт аб падтрымцы Украіны» ў свой заканадаўчы каляндар пасля другога чытання. Пра гэта гаворыцца ў апісанні законапраекта на сайце верхняй палаты амерыканскага парламента.

«Прайшоў другое чытанне. Унесены ў заканадаўчы каляндар Сената ў агульным раздзеле пад нумарам 462», – гаворыцца на сайце Сената.

Законапраект H.R.2913 «Акт аб падтрымцы Украіны» ў красавіку мінулага года ўнёс кангрэсмен-дэмакрат Грэгары Мікс. На пачатку чэрвеня 2026 года Палата прадстаўнікоў ухваліла яго пры падтрымцы Дэмакратычнай партыі і часткі рэспубліканцаў.

Гэты законапраект прадугледжвае найбуйнейшы пакет падтрымкі для Украіны з таго часу, як прэзідэнтам ЗША стаў Дональд Трамп.

Дакумент прадугледжвае прадастаўленне Украіне крэдытаў на суму $8 млрд на ваеннае фінансаванне, працяг дзеяння Ініцыятывы садзейнічання бяспецы Украіны (USAI) да 2027 года і ўвядзенне дадатковых санкцый супраць Расіі.