Трэнер Сабаленкі распавёў, чаму ў Беларусі няма топ-тэнісістаў сярод мужчын

• 24.07.2026, 12:22

Антон Дуброў вылучыў дзве асноўныя прычыны.

Антон Дуброў, які з 2020 года працуе з першай ракеткай свету Арынай Сабаленкай, падзяліўся сваім бачаннем прычын нізкага ўзроўню мужчынскага тэнісу ў краіне. Сваім меркаваннем беларускі спецыяліст падзяліўся ў інтэрв’ю sport5.by.

Паводле яго слоў, ключавая праблема — востры недахоп канкурэнцыі ўнутры краіны.

«Так, бываюць такія адзінкавыя выпадкі. Максім Мірны таксама ў свой час пачынаў тут, а потым у 13 гадоў пераехаў у ЗША, дзе ўзровень канкурэнцыі быў зусім іншым», — адзначыў Дуброў, дадаўшы, што поспеху можна дасягнуць і застаючыся ў Беларусі, але для гэтага патрэбныя значна большыя ўкладанні — найперш у частыя выезды і трапленне ў канкурэнтнае асяроддзе.

У якасці паказальнага прыкладу трэнер прывёў тэнісныя школы Іспаніі і Італіі, дзе, паводле яго назіранняў, дзеці бяруць ракеткі ў рукі літаральна з малых гадоў, а больш заможныя сем’і могуць дазволіць сабе часцей вазіць іх па турнірах. Там нават у суседняй вёсцы можа праходзіць прафесійны турнір — а значыць, сур’ёзная канкурэнцыя суправаджае гульца літаральна з першых крокаў і падцягвае яго ўзровень угару.

Пры гэтым Дуброў звярнуў увагу, што ў апошнія гады выязджаць на замежныя турніры з Беларусі стала прыкметна складаней і даражэй, чым раней.

Асобна трэнер закрануў тэму пошуку і прыцягнення спонсарскіх сродкаў — паводле яго слоў, гэта адзін з аспектаў, які беларускаму тэнісу варта было б сур’ёзна палепшыць.

«Першая важная частка — укласці іх менавіта ў трэнерскі працэс. Вельмі многія хлопцы з’язджаюць, а ў трэнераў не заўсёды ёсць магчымасць развівацца, чэрпаць новую інфармацыю», — падкрэсліў Дуброў.

На яго думку, прыярытэтам павінна стаць развіццё менавіта трэнерскага корпуса — каб ужо з самага ранняга ўзросту, а пасля і ў падлеткавым, настаўнік дакладна разумеў, што і з якой мэтай ён робіць у працы з юным спартсменам.