Польшча прапанавала бяспечную вытворчасць Patriot для Украіны

• 24.07.2026, 18:41

Улады Польшчы прапанавалі ЗША стварыць сумесную з Украінай вытворчасць ракет.

Улады Польшчы прапанавалі ЗША стварыць сумесную з Украінай вытворчасць ракет для сістэмы Patriot, піша PAP са спасылкай на намесніцу міністра абароны Магдалену Собковяк-Чарнецкую.

«Мы гаварылі пра тое, што сказаў прэзідэнт [ЗША Дональд] Трамп падчас саміту [НАТА] у Анкары, а менавіта наконт яго заявы пра разгляд пытання аб будаўніцтве завода для вытворчасці ракет Patriot ва Украіне», — заявіла яна.

Собковяк-Чарнецкая адзначыла, што амерыканскі прэзідэнт хоча, каб новая вытворчасць «была звязаная з Украінай». Яна дадала: «Сутнасць у тым, каб забяспечыць бяспеку вытворчасці, каб яна ажыццяўлялася ў бяспечным месцы».

«Сёння я падрабязна прадставіла крокі, ужо прынятыя польскім урадам. Сярод іншага, у нас ёсць канкрэтная пастанова Савета міністраў. Мы таксама падрыхтавалі законапраект, які мог бы забяспечыць фінансаванне», — заявіла яна. Паводле яе слоў, даклад быў добра ўспрыняты ў Вашынгтоне.

Яна таксама адзначыла, што Польшча працягвае абмяркоўваць з ЗША крэдыт у памеры $4 млрд на набыццё амерыканскай ваеннай тэхнікі ў межах праграмы замежнага ваеннага фінансавання. «Спадзяюся, што падпісанне [пагаднення] таксама адбудзецца на працягу некалькіх тыдняў», — дадала яна.

Паводле яе слоў, візіт у Вашынгтон таксама павінен паказаць апазіцыі, што ўступленне ў сілу механізму SAFE не выключае амерыканскіх закупаў.