У Браслаўскім раёне ДАІ падняла ў неба беспілотнікі

• 25.07.2026, 16:04

Кантроль узмацнілі з-за музычнага фестывалю.

У выхадныя ДАІ ўзмоцніць кантроль на дарогах Беларусі. Для выяўлення парушэнняў інспектары будуць выкарыстоўваць, акрамя іншага, беспілотнікі, матапатрулі і аўтамабілі без спецыяльнай афарбоўкі.

Як паведамілі ў МУС, дадатковыя сілы накіраваныя ў Браслаўскі раён, дзе праходзіць буйны музычны фестываль. На асноўных пад'ездах да месца правядзення мерапрыемства арганізаваныя прафілактычныя адпрацоўкі з выкарыстаннем БПЛА, матапатрулёў і змешанага кантролю за дарожным рухам. За бяспекай таксама сочаць супрацоўнікі спецпадраздзялення ДПС «Страла» і экіпажы ДАІ Гродзенскай і Мінскай абласцей.

Асобную ўвагу інспектары нададуць выяўленню нецвярозых кіроўцаў і тых, хто сеў за руль без правоў. Акрамя таго, пад узмоцненым кантролем будуць выкананне хуткаснага рэжыму, правілаў абгону і манеўравання, а таксама выкарыстанне рамянёў бяспекі, моташлемаў і дзіцячых утрымлівальных прылад.