СБУ паразіла караблі са зброяй з Ірана

• 25.07.2026, 20:53

Раскрыты падрабязнасці атакі ў Каспійскім моры.

Служба бяспекі Украіны ў ноч на 25 чэрвеня нанесла ўдары дальнабойнымі дронамі па цэлях на тэрыторыі РФ. У выніку атакі вядома пра паражэнне трох судоў, два з якіх непасрэдна звязаныя з пастаўкамі зброі з Ірана, а таксама нафтаздабыўной платформы радовішча «Філанаўскага» ў акваторыі Каспійскага мора. Пра гэта паведамілі аналітыкі выдання Defense Express.

Адзін з паражаных аб’ектаў — універсальнае сухагрузнае судна Port Olya 2, якое належыць падсанкцыйнай расійскай кампаніі ТАА «МГ-Флот». Паводле даных партала ГУР МОУ «War. Sanctions», гэта судна выкарыстоўвалася для перавозкі ваенных грузаў з Ірана ў Расію.

Яшчэ адной цэллю стала судна Begey, якое ходзіць пад расійскім сцягам. Паводле інфармацыі ўкраінскай разведкі, яно таксама ўдзельнічала ў транспарціроўцы ваенных грузаў, сярод якіх патроны, артылерыйскія боепрыпасы, бранежылеты і шлемы. Акрамя таго, падчас асобных рэйсаў экіпаж адключаў аўтаматычную сістэму ідэнтыфікацыі AIS, каб схаваць маршрут судна.

Асобна пад удар украінскіх дронаў трапіў ракетны катэр праекта 12418 «Молнія», які ўваходзіць у склад расійскага флоту.

У Defense Express звяртаюць увагу, што такія ўдары ўжо не з’яўляюцца беспрэцэдэнтнымі. Украінскія сілы раней ужо дэманстравалі здольнасць паражаць цэлі ў Каспійскім моры, якое знаходзіцца прыкладна за тысячу кіламетраў ад патэнцыйных раёнаў запуску ўкраінскіх дальнабойных беспілотнікаў і крылатых ракет.

Аналітыкі нагадваюць, што яшчэ на пачатку мая Сілы абароны паразілі ў Каспійскім моры малы ракетны карабель праекта 22800 «Каракурт» — носьбіт крылатых ракет «Калібр», якія Расія неаднаразова прымяняла для удараў па тэрыторыі Украіны менавіта з акваторыі Каспійскага мора.

«У той жа час удары па грузавых судах, якія перавозяць зброю з Ірана ў РФ, можна назваць цалкам чаканымі — бо яшчэ некалькі месяцаў таму, у красавіку, РФ і Іран, карыстаючыся перамір’ем з ЗША, паспешліва актывізавалі трафік праз Каспійскае мора. І сухагрузныя суда, задзейнічаныя для гэтага, з’яўляюцца законнымі і дастаткова добрымі цэлямі для СОУ», — гаворыцца ў матэрыяле.