Іспанія і Францыя эвакуююць больш за 220 тысяч чалавек
- 26.07.2026, 2:54
Маштабныя лясныя пажары выйшлі з-пад кантролю.
Французскія ўлады распарадзіліся эвакуіраваць амаль 60 000 чалавек у ваколіцах Бордо праз маштабныя лясныя пажары, якія ўспыхнулі на тэрыторыі Францыі і Іспаніі. Усяго больш за 220 000 чалавек загадалі пакінуць небяспечныя раёны, паведамляе BBC.
Паведамляецца, што каля 200 000 чалавек былі эвакуіраваныя на паўднёва-захадзе Францыі ў рэгіёнах Жыронда і Ланды. Прэзідэнт Францыі Эманюэль Макрон мабілізаваў узброеныя сілы для аказання дапамогі ў ліквідацыі пажараў.
Іспанскія ўлады папярэдзілі, што пажар у ваколіцах Мадрыда перавышае магчымасці пажарных па яго лакалізацыі пасля таго, як тры ачагі на захад ад сталіцы зліліся ў адзін. Таксама ўрад Іспаніі абвясціў надзвычайнае становішча ў краіне: 25 000 чалавек атрымалі загад на эвакуацыю, а амаль 40 000 чалавек — не выходзіць са сваіх дамоў.
Паводле слоў прэзідэнткі аўтаномнай супольнасці Мадрыда Ісабэль Дыас Аюсо, гэта найгоршы пажар у гісторыі рэгіёна. Яна адзначыла, што на гэты раён абрушылася бура праз высокія тэмпературы, няўмольны вецер і зліццё франтоў пажару.
Іспанскія мясцовыя службы экстраннай дапамогі паведамілі, што лясныя пажары рухаюцца ў напрамку муніцыпалітэтаў Робледа-дэ-Чавэла і Фрэснедыльяс-дэ-ла-Аліва, якія знаходзяцца за 50 км ад сталіцы Мадрыда.
«Лясны пажар дасягнуў свайго піку і цяпер выходзіць за межы магчымасцяў пажарных па яго лакалізацыі», — расказаў журналістам Карлас Новільё, кіраўнік упраўлення па надзвычайных сітуацыях рэгіянальнага ўрада Мадрыда.
Каб спыніць прасоўванне полымя, Іспанія задзейнічала Ваеннае падраздзяленне па надзвычайных сітуацыях. Яго асноўная задача — абарона тэрыторый паблізу горада Эль-Эскарыял.
Улады таксама сочаць за асобным лясным пажарам у суседняй правінцыі Авіла. Чыноўнікі баяцца, што велізарны пажар у Бургоондо можа злучыцца з мадрыдскім. Міністр унутраных спраў Іспаніі Фернанда Грандэ-Марласка заявіў, што ўлады робяць усё магчымае, каб прадухіліць зліццё гэтых двух пажараў.
У выданні дадалі, што ў Мадрыдскім рэгіёне выгарэла не менш як 6 000 гектараў зямлі, а пажар у Авіле ахапіў амаль 9 000 гектараў. Былі эвакуіраваныя восем муніцыпалітэтаў, у тым ліку Чапінерыя, Навас-дэль-Рэй, Кальменар-дэль-Арроё, Фрэснедыльяс-дэ-ла-Аліва, Робледа-дэ-Чавэла, Альдэя-дэль-Фрэсна, Наўалагамеля і Сарсалехо. Яшчэ некалькі населеных пунктаў, у тым ліку Сан-Марцін-дэ-Вальдэіглесіяс, Пелайос-дэ-ла-Прэса і Вілья-дэль-Прада, знаходзяцца ў рэжыме ізаляцыі.
Акрамя таго, іспанская Грамадзянская гвардыя затрымала аднаго чалавека і вядзе расследаванне ў дачыненні да яшчэ аднаго ў сувязі з пажарам у Бургоондо. Чыноўнікі не выключаюць, што пажар у Бургоондо мог быць выкліканы нядбайнасцю пры выкарыстанні цяжкай тэхнікі ў перыяд дзеяння абмежавальных мер.