У Мінску затрымалі «чорнага рыэлтара»

• 26.07.2026, 4:11

Ён спрабаваў махлярствам завалодаць кватэрай мінчука.

Сілавікі затрымалі 37-гадовага мужчыну, якога падазраюць у спробе завалодаць двухпакаёвай кватэрай 49-гадовага мінчука. Калі ўладальнік жылля адмовіўся ад нявыгаднай здзелкі, яго збілі і прымусілі напісаць распіску пра неіснуючы доўг, паведаміла прэс-служба МУС.

Паводле інфармацыі сілавікоў, раней судзімы прадстаўнік адной з дыяспар цягам двух месяцаў «апрацоўваў» уладальніка кватэры. Паведамляецца, што пацярпелы меў шкодныя звычкі, таму лёгка паддаваўся маніпуляцыям.

Спачатку 37-гадовы фігурант прадставіўся рыэлтарам і заявіў, што адрас кватэры з запазычанасцю па камунальных плацяжах яму нібыта падказалі ў сілавых структурах. Пасля гэтага ён рабіў выгляд, што клапоціцца пра ўладальніка: дапамагаў аплачваць паслугі ЖКГ і даваў невялікія сумы наяўнымі.

У выніку яны дамовіліся пра здзелку. Аднак напярэдадні падпісання дакументаў мінчук даведаўся, што замест абяцанай аднапакаёвай кватэры і даплаты яго збіраюцца перасяліць у населены пункт за 50 км ад сталіцы. Пасля гэтага мужчына адмовіўся прадаваць кватэру.

Тады, як паведамляе МУС, так званы рыэлтар перайшоў ад угавораў да пагрозаў і гвалту. Ён збіў пацярпелага і прымусіў напісаць распіску пра неіснуючы буйны доўг.

Фігуранта затрымалі пры сілавой падтрымцы спецпадраздзялення «Алмаз». Следчыя ўзбудзілі крымінальную справу за вымаганне ў асабліва буйным памеры (ч. 3 арт. 208 КК). Мужчыну пагражае да 15 гадоў пазбаўлення волі.