У акупаванай Алушце ўвялі рэжым НС

• 26.07.2026, 6:39

Горад больш за двое сутак застаецца без электрычнасці.

У сувязі з працяглым адключэннем электраэнергіі пасля атак Узброеных Сіл Украіны ў акупаванай Алушце (Крым) увялі рэжым надзвычайнай сітуацыі, паведаміў мясцовы аператыўны штаб у Telegram. Паводле яго звестак, «Крымэнерго» ўжо перадаў спіс абанентаў, якія засталіся без святла больш за 48 гадзін (акрамя вёсак Солнечногорское, Малореченское, Рыбачье, Генеральское, Лесное) у «мінпрацы» Крыма і ГУ МНС Расіі па рэгіёне, а з 27 ліпеня жыхары змогуць падаць заявы на выплаты праз «Госуслуги».

Складаная абстаноўка, паводле паведамлення «Крымэнерго», назіраецца і ў іншых раёнах: на паўночным захадзе, усходзе і поўдні Крыму. Таксама ў прэс-службе ГУП РК «Вада Крыма» заявілі пра адсутнасць вады на захадзе і паўднёва-ўсходзе рэгіёна — у Еўпаторыі, Судаку, Феадосіі і прылеглых пасёлках.

Напярэдадні камандуючы Сіламі беспілотных сістэм Украіны Роберт «Мадяр» Броўдзі у Telegram адрапартаваў пра аперацыю «Крымскі рубільнік off»: толькі ў перыяд 23–24 ліпеня было пашкоджана 19 энергавузлоў (17 у Крыме, 2 на іншых акупаваных тэрыторыях), усяго з 1 па 24 ліпеня — 136 мэтаў. Сярод атакаваных — падстанцыі ў Ялце, Гурзуфе, Феадосіі, Еўпаторыі, Судаку і іншых населеных пунктах.

Паводле даных Адміністратара гандлёвай сістэмы аптавага рынку электраэнергіі («АТС»), у першыя 20 дзён ліпеня спажыванне электраэнергіі ў Крыме ўпала на 42% у параўнанні з мінулым годам, у Севастопалі — на 22%. Балаклаўская ТЭС не працуе з 15 ліпеня пасля ўдару па турбіне Siemens, Таўрычаская ТЭС працуе не на поўную магутнасць. Выпрацоўка электраэнергіі ў Крыме (без Севастопаля) абвалілася на 86% у параўнанні з мінулым годам.