Сырскі зрабіў новую заяву пасля адстаўкі з пасады галоўнакамандуючага ЗСУ
- 26.07.2026, 9:14
Мова пра ваенных кіраўнікоў дзяржаў-саюзнікаў і НАТА.
Былы галоўнакамандуючы ЗСУ Аляксандр Сырскі пасля адстаўкі зрабіў новую заяву, у якой распавёў пра паведамленні і словы падтрымкі, якія ён атрымаў ад ваенных кіраўнікоў дзяржаў-саюзнікаў і НАТА, перадае УНІАН.
«Я шчыра ўдзячны нашым міжнародным партнёрам, ваенным кіраўнікам дзяржаў-саюзнікаў і НАТА, з якімі меў гонар працаваць цягам гэтых няпростых гадоў», – адзначыў ён.
Сырскі распавёў, што, у прыватнасці, атрымаў паведамленні ад еўрапейскіх ваеначальнікаў – старшыні Ваеннага камітэта НАТА адмірала Джузэпэ Каво Драгонэ, старшыні Ваеннага камітэта Еўрапейскага Саюза генерала Шона Кленсі і былога начальніка Штаба абароны Вялікабрытаніі адмірала Энтані Радакіна.
«Асабліва кранулі словы адмірала Джузэпэ Каво Драгонэ пра тое, што ўкраінская армія сваёй стойкасцю, адаптыўнасцю і ўкараненнем найноўшых тэхналогій ужо змяняе ўяўленні НАТА пра сучасную вайну, а досвед нашых вайскоўцаў стане часткай будучай ваеннай навукі. Гэта найвышэйшая ацэнка для ўсіх украінскіх абаронцаў», – напісаў ён.
Акрамя таго, паводле слоў Сырскага, адмірал Радакін напісаў, што Украіна павінна распавесці свету сваю гісторыю пра тое, як ёй удалося адбіць расійскую армію і вытрымаць у вайне супраць значна мацнейшага праціўніка.
А генерал Шон Кленсі падкрэсліў, што барацьба Украіны – гэта не толькі абарона ўласнай тэрыторыі, але і абарона прынцыпаў, на якіх грунтуецца бяспека ўсёй Еўропы.
«Усе гэтыя словы — не пра мяне асабіста. Яны пра ўкраінскіх ваяроў. Пра камандзіраў, сяржантаў і салдат. Пра тых, хто трымае фронт, укараняе новыя рашэнні, вучыцца, змагаецца і, на жаль, нярэдка аддае за Украіну самае дарагое», – падкрэсліў былы кіраўнік штаба.
Нагадаем, 21 ліпеня прэзідэнт Украіны Уладзімір Зяленскі вызваліў Аляксандра Сырскага ад пасады галоўнакамандуючага ЗСУ. Новым галоўнакамандуючым быў прызначаны генерал-маёр Міхаіл Драпаты.